|
|
樓主 |
發表於 2010-10-18 14:49:54
|
顯示全部樓層
發挪威脾氣
左丁山
第一位拿中國護照嘅中國人得到諾貝爾獎，結果係不受中國歡迎，反而拿美國英國護照嘅海外華裔攞到諾貝爾獎，北京就隆重歡迎，以上賓之禮招待，只有法國籍嘅高行健除外。北京素來重理輕文，科學家大多不理會政治、社會，埋首於理論或實驗室，對社會人心無甚影響力，但係文學家以小說諷刺時弊，可以含沙射影，鼓動人心，乃是統治者大忌，
關於劉曉波呢位由頭到尾都係中國人攞諾貝爾和平獎，歷史上可與蘇聯沙卡羅夫，緬甸昂山素姬，波蘭華里沙並列，好易成為中國爭取民主嘅頭號 icon，就更加攞命，直中北京要害㖭。
中國已成世界第二大經濟體系，富豪之多（以人數計）僅次於美國，外匯儲備有二萬六千五百億，係美國國庫債券大買家，故此所有國家都畏懼中國三分，為咗十三億人大市場，唔敢開聲得罪中國。既然如此，中國係堂堂大國，為何如此小器，不能容下諾貝爾和平獎？既然劉曉波已被判入獄，發放遼寧錦州，外人不能接觸，駛乜仲要發挪威脾氣，取消部長級會議，撤銷挪威音樂家嘅中國演出呀？
歐洲人看在眼裏，暗笑在心裏，對當今經濟大國，何來半點尊敬？事先施壓不成，事後大發小孩子脾氣，正是徒具大國身軀，只有小國腦袋，可嘆也；挪威素來係一個中立和平國家，對中國何來威脅？挪威國營石油公司 Statoil與中石化（ Sinopec），及中化集團（ Sinochem）有合作協議，在中國及巴西開發油氣田，呢啲「講錢」嘅項目，唔會傷感情啩？取消音樂交流，中國會覺得閒過立秋，但取消石油合作項目？猜想中國會慎重考慮成本收益，唔會一時衝動。挪威人十分聰明，知道靠北海油田發達，非長遠之計，於是每年將石油收益撥入一個「挪威石油基金」，在二○○八年，將呢個基金名稱更改為「 The Government Pension Fund- Global」，擁有四千五百三十億美元資產，基金不投資於挪威，只在海外買資產，而且高度透明，設下合乎倫理規範嘅投資準則（ ethical investment guidelines），投資講人權，講社會責任及環保，仲委任一位哲學教授負責投資，中國投資公司（國投）有排都未學得到。
[ 本帖最後由 intermezzo 於 2010-10-17 22:50 編輯 ] |
|
樓主: intermezzo
在線雷達
發表於 2010-10-16 06:58:48
發表於 2010-10-17 23:29:11
