自家制－椒鹽斑馬瀨尿蝦晚餐

alexGTR · 發表於 2014-4-8 03:26:11

各位師兄，開飯啦！

先前去咗沙巴玩，（唔係近期！禾去果時未有挷架，即係都幾耐吓！）大家都知沙巴有邊間直海鮮出名？緊係近海邊嗰間啦！咁果次係第一次直斑馬瀬尿蝦，可能佢哋斬得細舊，食完好似意尤未盡咁，果三隻嘢食咗成差唔多三舊水！俾D相大家汰吓先！

好嘞！咁返到香港有幸喺街市見到，貢就買咗6隻，2大4小，大嘅有12吋長一隻，細嘅都有8－9吋一隻，數量都差不多夠食，咁買咗返嚟就要劏，可以話俾你哋知，大隻就瞓咗，細隻仲生猛嘅！貢點整好呢？緊係椒鹽啦！

材料：
斑馬瀨尿蝦6隻

配料：
紅辣椒一隻切粒或圈
乾蒜一樽（金蒜）
蔥適量
芫茜適量

調味料：
雞粉適量
椒鹽適量
糖適量
廚酒適量

做法：
先將尿蝦放尿，用筷子喺蝦嘅尾部下邊有個細窿仔，插入去，就會有水標出嚟，呢個步驟好重要！放咗尿一陣走油都唔駛俾油彈到飛天！跟著要將D蝦斬件，禾有貢多貨，貢係斬大舊D！直得開心D吖嘛！大隻一開三，細隻一開二！

心得教路：未斬件時，一定要剪哂D腳，即係用嚟游水果D腳，因為有毛，會藏水，唔剪走佢，包你走油時一定係你呢生人最開心嘅時光，因為我已經俾油彈到飛咗天！（有D似尤伯連納！叫人唔好食煙咁！）
記住，走油前用生粉封咗見到肉嘅地方先走油，可以保存蝦嘅水份，D肉唔會乾爭爭！

走完油後將個鑊洗淨，落少少油將配料落鑊爆咗先，金蒜粒同芫茜除外，再落返D瀨尿蝦回鑊落調味料炒勻，之後落返少少廚酒去鑊邊，聞到酒香就落埋D金蒜半樽同椒鹽，快炒幾下就可以上碟！D芫茜做裝飾就得！

咁其他仲有乜嘢食先？當然有好正嘅海鮮雞粥，個粥有蝦，有蟹，有雞！其實做法同之前我出過嘅鲍魚海鮮粥一樣，詳情麻煩各位睇返個帖。
http://141hongkong.com/thread-1320767-1-1.html

另外就整咗個豉油皇炒麵，呢個要同大家講吓點炒。

材料：
全蛋麵餅二個
芽菜同九菜適量
芝麻適量

調味料：
雞粉適量
糖、老抽適量

做法：
先預備兩個全蛋麵嘅麵餅，用滾水淥開佢，撈起備用，燒熱滾油將麵落鑊炒，同時間落適量雞粉同老抽，用鑊剷同筷子炒勻落埋D牙菜同九菜，睇到D老抽均勻地上色就可以上碟，最後加少少芝麻就得！

果碟蒜茸炒菜芯都冇提過添，真係懶！罪過，罪過！

最後整個全家幅俾大家，希望大家中意！

多謝收看！
（嘩！呢個帖打咗我成個半鐘，飽到嘔！）