黑椒牛柳絲炒可口絲

alexGTR · 發表於 2014-2-13 03:51:34

開飯啦！

各位師兄好，多謝各位對小弟支持，今日為大家介紹一個可以兩食嘅小炒，點樣可以演變為另一個菜，我容後會為大家介紹！

首先預備材料:
牛扒兩塊切絲
芽菜3蚊，唔駛多
可口絲-即粉絲四小包（每包2蚊到2.5蚊）

調味料:
黑椒碎少量
雞粉少量
蠔油少量
老抽少量（較色用）

做法:
先用黑椒碎，雞粉，糖，喼汁，生粉及少量水醃牛柳絲，醃好後落鑊炒熟，然後上碟備用。將粉絲用滾水汆熟撈起備用，勿過火，剛熟就要撈起，太熟會糊口！最後滾油開鑊，落芽菜，牛柳絲回鑊，後落粉絲炒勻，落少量雞粉及蠔油調味，再用少量老抽較色，完成如圖。

後加生菜墨魚滑湯

做法極簡單: 生菜切絲，煲滾水用匙或刀將墨魚滑刮落滾水度，熟後再將生菜加入，用魚味濃湯寶及少許鹽調味就完成。（旁邊係切絲剩餘嘅牛扒）

跟住要為大家解釋點樣用相同材料去整另一個餸，呢個餸係黑椒牛柳粒粉絲煲。

做法:
先將粉絲滾水汆水後撈起，預備煲仔放入芽菜，粉絲放面，然後爆牛柳粒及青紅椒，落多少少水去炒，炒起後埋薄芡，轉入煲仔，開中火，滾到煲仔出煙攪掂！快，靚，正！上枱！

希望各位中意及多謝觀看！