泰式生蝦

笛子魔童 · 發表於 2013-9-21 08:36:27

呢道菜其實已經整左好多次，但係大家都一定會拍板叫我整多次。
出面餐廳食既一定無自己整既咁好食，一黎幾隻蝦毛就收你幾十蚊，２黎你好大機會食到唔新鮮或者晦口既蝦，都唔知擺左幾耐.

泰式生蝦

材料如下：　
竹星蝦（或者任何新鮮游水中蝦都得）　
份量隨意
冰　足夠浸３次蝦令佢爽脆
辣椒: 如圖，切粒放一粒係每隻蝦上面

泰式生蝦醮料：
香茅　一條，切碎
蒜頭　2粒，切碎
紅蔥頭　一粒，切碎
魚露　適量（大約６－７匙）
砂糖　4匙
白醋　１匙
辣椒　一條切碎
青檸汁/檸檬汁一兩滴

方法：

１。先將買返黎既生蝦用冰加開水浸左先，等佢個蝦殼易剝ｄ，同埋令佢爽口ｄ。

２。之後開另一盤冰水放係度，將ｄ蝦殼連蝦頭剝左佢，留返條尾，就可以放落另一盤冰水度等佢冰一冰身！

３。剝曬全部放曬係盤冰水度由佢浸一陣或者加多兩粒冰，等佢快ｄ爽ｄ，之後又係開另一盤冰水放係度，等陣再用。

４。最後一個步驟就係將蝦開邊，係個蝦背度開一刀，留返條尾，如果有蝦腸就挑埋佢，開完邊就可以放落最後一盤冰水度，蝦會冰到周邊爆開及少許轉淺色，呢個就為之好。

５。之後就可以上碟，先將冰放係碟度，上面擺ｄ蝦上去，每隻蝦就上面放一粒切粒辣椒，可以提鮮，賣相亦好

泰式生蝦醮料：

將香茅，蒜頭，紅蔥頭，辣椒全部切碎，連魚露，砂糖，醋，青檸汁一齊撈埋就得.

筆記:
1. 一定要買新鮮游水蝦。
2. 買返黎唔即刻整都可以，可以先放雪櫃，整之前先拎返出黎。

ref.wonderwall