林莉好哥再回味

燕青小乙 · 發表於 2012-7-8 13:20:13

高妹林莉原來係哥哥fans!!!

2003年的愚人節，不少港人永遠難忘，因為一代巨星張國榮自殺身亡。圈中超級粉絲林莉家中珍藏逾千項有關他的物品，讓她可以不時重溫偶像的昔日風采，回味再回味。

名模林莉（Carrie）自小受兄長與姊姊的薰陶而愛上他－張國榮（哥哥），她激讚偶像不僅外貌俊朗，歌藝與演技同樣了得：「阿哥同家姐都係Super Fans，我自小聽佢嘅歌長大，佢每一首歌都識唱！」不過，哥哥於2003年的4月1日自殺離世，Carrie永不忘記這個沉重的打擊，她說：「朋友話我知，我都唔信，以為愚人節整蠱我，點知睇到新聞報道嗰刻真係唔敢相信！我足足喊咗成個星期，連飯都食唔落。」

捐窿捐罅尋寶

Carrie感慨哥哥永在心中，無人可代替，及後兄長與姊姊相繼結婚，她更將兩人的珍藏據為己有，包括黑膠唱片、演唱會門票、電影宣傳海報與寫真集等應有盡有，珍藏數量以千千聲計算：「我依家得閒都會去鴨寮街或者夜冷店搜羅關於張國榮嘅嘢，甚至買埋每隔一段時間推出所謂嘅珍藏系列，總之係張國榮我就要。」為懷念偶像，她表示不時翻看珍藏：「我試過24小時狂煲佢有份演出嘅電影，睇完一部又一部。」

為方便擺放珍藏，Carrie找專人於睡房訂造入牆櫃，問到會否割愛？她二話不說即Say No：「每一樣我都珍而重之，多多錢都買唔到，係無價寶！」

掛滿偶像

迷戀哥哥的林莉自爆當年哥哥每推出一張電影海報，都會買來作收藏。為免有摺痕，她還逐張用大型鏡架裱起來：「我有間房全部都掛滿張國榮有份參演嘅海報，嗰間房係我嘅快樂小天地，見到每張海報或者相片，感覺哥哥仍在人間！」

訂造專櫃防潮

林莉對每樣珍藏均珍而重之，為免寫真集、相集或電影海報因時間或潮濕而變黃及損毀，她透露已訂造大櫃方便收藏：「整個設計構思我都有份參與，分為唔同層格，易於分類處理，有啲層格仲裝有特製燈管，係防潮濕之用！我仲會定期將珍藏翻閱，又或者將影碟或黑膠唱片逐張睇、逐張聽，以確保質素。」

張國榮生前最後寫真集日本版，林莉珍而重之。

張國榮《為你鍾情》黑膠唱片，林莉不時Encore。

張國榮不同時期的造型照片。

張國榮的電影Postcard亦是林莉主要收集項目之一。

張國榮於1988開演唱會，門票只售$200！

張國榮《追．憶純影集》。

張國榮金曲珍藏本。

小乙短評:
林莉真係好正,我都同佢影過相,佢真人有成1.8米咁高..遲D會post出來俾大家睇!!
大家覺得林莉正唔正??