圓石藍GS3開箱文！分享少少你可能不知的隱藏功能！

我係分身 · 發表於 2012-6-26 07:03:10

小弟用0左三星電話都有十二年了..
由人生第一部電話黑白機用到而家0既第八部三星手機..中間未試過轉第二個牌子..
可以話係一個200%0既死忠！...以下呢篇分享大家就當係鱔稿咁睇啦...哈哈...
唔鍾意睇0既可以走先..因為下面都幾長氣..無謂0徙大家時間

話說小弟由用0左一年0既S2升級去S3...6/9拎機..
眼見討論區成日有人話冇S3開箱文....於是我就0拿0拿聲整一篇出0黎俾大家嘆嘆..
哈哈...廢話唔講咁多..入正題...

開頭有兩隻色揀...因為見得太多白色機..同自己都用過幾部黑色機..
所以一開始就已經選定0左圓石藍...
機身顏色同質感有金屬紋...好特別..呢個亦都係其中一個我揀藍色0既原因..

雖然話到底都係膠機一部......但由於顏色問題..膠感都可以減到少少0既..
0係唔同燈光同角度下...其實機身顏色變化都好大...時灰時藍時紫...好詭秘
要自己見過實機先會知係咪自己杯茶..
目錄鍵同返回鍵0係唔著0既情況下係收埋0左..
比起有0的機就算唔著都有個燈印0係度型仔得多..

本人不嬲都唔鍾意用原裝0野..
所以已經早早就裝入GO介面了..個性化好多..
原裝介面反應都好快..其中一個iFanboy 0既fd都話反應同iphone一樣..
但我覺得GS2已經係啦...可能係GS3塊康寧2代玻璃跣手...所以感覺上快
另外..之前上網睇過教學...
唔知大家有冇發現撳home制返home page 0既反應好鈍呢？
咁係因為S Voice function 0既出現..按兩0下就自動彈入S Voice..
0係你按一0下後..因為電話未識別到你會否撳多次home制入s voice..
所以撳完一次出home page會等一陣先真正出到home page...
解決方法...入s voice個setting...untick "launch s voice"就OK 0架喇..
反應當堂jar jar 聲...

拎0左GS I9003, GS2, GS3作芒比較..
先唔好講之前一大堆數據又話GS3低解像度過GS2等等說話..
因為我對眼就係証據！試問未真正用過兩部機0既人有乜証據咁講？..
數據呢0的0野..從來都係好死..！
GS3個芒的確清過GS2好多...偏色問題亦得到改善..
其實本人部GS2係第一水...所以偏色問題冇咁嚴重(可以話係冇)..年底出0個0的GS2..真係偏色到離晒罩！

0黎到呢一代GS3..我諗三星都知道某0的用家0既意見...
話個芒好味精/0的色濃到假...所以今次就加入0左"自然"mode俾大家去揀...
大家可以睇0下下面標準mode同自然mode 0既分別....色水爭好遠..我係絕對唔會用"白烚:mode的
不過對我0黎講...由以前N年前用第一部三星彩芒用0既普通TFT...就係鍾意佢個芒色水夠sharp..
比其他牌子吸引好多...可能用0左咁多年...養壞0左我隻眼了...大家就當我色弱啦..哈哈

講完上面堆廢話之後..
接落0黎就同大家講講GS3入面一0的可能冇乜人知0既功能啦..
可能有0的大家都會知...

聽歌方面...今次GS3用返Wolfson隻晶片...音質有返咁上下..
層次感都豐富...
一洗GS2爛音皇之名...
有Iphone用家話仲好音過iphone...不過人0地對耳唔同自己對耳..
呢方面真係要自己試過先知..
有一個分唇唔知大家知唔知..
就係大家只要講".P.l.a.y"..."S.t.o.p"..."N.e.x.t"..".P.a.u.s.e"...
播放器就會跟住你0既語音指令去做...

影相方面...真係做到零廷遲...好快..
另外..由lock機畫面入...大家都知只要用一隻手指按住芒90度轉就即刻入到相機外..
其實仲可以set喚醒指令...只要大家set 0左...lock機畫面講"影相"...就會即刻入相機.."解鎖"就解鎖
咁當然...set喚醒指令0個陣...唔一定要set講"影相"0既..講"相機"..."photo"都得..
解鎖講"芝麻開門"都得...又離0左題tim..哈哈..

仲有...之前見到有post話買GS3俾人呃..俾人坤話影相有聲控...其實冇...
但我想講0既係...GS3影相的而且確係有聲控...！...我要大平反！
其實GS3個聲控影相真係好方便...原理同幾年前三星Mirror系列0既DC仔一樣..
(影相介面右上角其實有個人仔提示...不過好多人都唔知係乜東東)
相信好多人試過一大班人又或者自己一個自拍0個陣..無論用主鏡頭定前鏡頭...
0係一部冇影相實鍵0既手機自拍...係一件難事...唔係手震...就撳錯第二0的制..
其實大家只要0係影0個陣...講"Smile"又或者"Cheers"...手機就會自動影0架喇...
唔信0既話...大家拎住自己部GS3試0下...前後鏡頭都得..
不過唔好0係街試..我驚人0地以為你精神有問題...哈哈

除此之外...其實今次GS3都加入好多聲控功能...例如鬧鐘暫停等等...當鬧鐘響0個陣...
停-->就叫"stop"
訓多陣-->就叫"snooze"
其實呢個分唇絕對係有0的用0架...
因為我最怕鬧鐘響0個陣要開眼光殘殘望個芒0係邊
跟住又要搵0下個stop制0係邊撳熄佢..完全想打爆部電話..超煩

不得不提...仲有下面呢個靈異功能..."在袋裡時增加音量"..
先勿論究竟用乜原理同實用性有幾大...
有呢個功能...人性化方面都可以加返0.5分0既...

另外...我想講講LED提示燈方面...
led從來都大多出現0係日韓手機裡頭...
我對上一部有led燈0既電話已經係N628了(黑白機)..
後生仔未必知係邊部...但當時N628 0既16和弦鈴聲真係出晒名..
哈哈..又離題...
我見有好多人都問除0左本身LED三隻原色外(紅綠藍)...仲有冇得set第二隻色...
其實答案係有！只要用第三方app....紅橙黃綠青藍紫粉紅白...你鍾意瘀黑色都得tim呀！
而且第三方app比機本身setting 0黎得更detail..
email用乜色...whatsapp用乜色..line用乜色...fb用乜色...fd caster用乜色..下刪六千字

最後..我就係要講講呢個我最欣賞0既分唇 - NFC/S Beam喇...
NFC可以check發達通餘額我諗大家都知...
但我發覺原來好多人將Andriod Beam同S Beam撈亂0左...
好多人都話..."車..S Beam咪即係Andriod Beam...抄0野當新0野"
但其實S Beam係Andriod Beam 0既升級版...三星都已經講0左..
S Beam其實係結合0左wifi direct 0既一個超方便傳file方法..
用過wifi direct send file都知...其實比用bt send file係快好多倍..
但其中一個不便就係同bt一樣...send 0野0個陣要search人...擾攘一輪..
而S Beam就係慳0左呢個step...只要兩部機一拍...就可以唔駛search人...自動過file
咁同Andriod Beam有乜分別呢..？...分別就大lor...
你試0下用Andriod Beam send大圖/歌/片...睇0下send唔send到0野？..
其實Andriod Beam只能夠send一0的簡單0既data...不過可能遲0的會有第三方apps改良Andriod Beam都唔定.

仲有一個功能我想提一提....就係0個個什麼畫中畫...
如果youtube...同其他media player都support埋會好好多...
至於你話呢個分唇曾經掀起話題...大家又話三星抄唔知邊個邊個app..
問心..你估三星咁大間公司真係唔知有呢0的apps咩？
佢0地個Marketing不嬲都勁...試問...GS3未講有畫中畫之前...有幾多人係知有類似0既apps呢？
我諗好少人知囉...(起碼我見識少唔知先)
介唔介意俾人話抄app係其次...主要目的係能夠令部機成功製造話題有gimmick..
人0地一講起畫中畫只會諗起GS3...marketing就係成功0左..

好喇...講0左咁多廢話...就作個簡單總結吧..
成日見到有人開post問買one x好定GS3好..
跟住就會有一大班人話...0個部有偏黃...呢部又偏藍...又lee又路
從來...我只信自己隻眼...人人口味都唔同...
有人食糉鍾意落砂糖...有人鍾意落豉油...有人鍾意兩樣都落...
始終...要自己試過先知道自己0既口味...
道理同買機一樣...買之前自己最好試清楚..無謂上網問人..
因為家陣係你用...而唔係人0地用...

真係最後最後喇...
想0係度同大家分享一0下自己每次換Andriod機都必裝0既例菜..
1)Go介面 - 有好多theme單撈...icon...過場效果..版面...通通可以易容一番...同以前Nokia/SE換theme差唔多
2)香港地區天氣 - 用過最好用0既天氣apps..外國個0的apps天氣唔準...唔夠detail..
唯獨是試過咁多得呢個本地app最正...widget算靚仔..下至酷熱天氣警告..上至黃雨黑雨...十號風球,一號風球都有 reminder/pop-up..而且仲識得耐唔耐定0下位..身處沙田就知沙田天氣...唔會就咁好似外國app...Hong Kong就代表晒
3)Blackmart/N多網 - 用開Andriod機都知係乜東東...總知係正0野啦..自己上google search apk檔單撈！冇死錯人！
4)小熊來電 - 自動攔截廣告電話...正！
5)Full Screen Caller ID - 全熒幕高清來電照片/短片顯示...用過咁多呢個最正！
6)Flashlight - 電筒
7)香港地鐵輕鐵 - 比官方app好用成千倍
8)KMB - check巴士線
9)Screen Off and lock - 將widgets放0係home page..一按即鎖...減少lock/power鍵秏用率
10)Chaton - 比whatsapp更全面...更多0野玩..同時可以0係電腦玩(0係公司唔駛成日俾人見拎住部電話玩)...支援ios/andriod/window...
11)Dolphin/Opera Mobile - 覺得原裝browser唔好用0既話...呢兩個都唔錯..
12)After Focus/Little Photo/Pixlr-o-matic/Photo Shake Pro - 基本上...改相effect...用呢4個apps已經夠玩有凸
13)八達通餘額 - 配合NFC check八達通餘額
14)Light Flow - 將手機0既led提示燈setting完全玩盡15)Foto Tiles Slideshow - 用過最正0既幻燈片live wallpaper...可以揀自己相...不過Play Store已落架..要自己0係google搵apk檔

最後....送上一張溫情洋溢0既銀河全家福...