寶路華之父退休

man36951 · 發表於 2012-6-16 12:53:48

當年寫下港足黃金歲月搞波原為做推廣
寶路華之父退休

寶光實業宣佈，年屆 69歲嘅主席兼行政總裁黃創保榮休，由佢 51歲嘅細佬黃創增接任。對好多年輕人嚟講，呢份可能只係一張普通嘅交接通告，但對華華呢啲老餅嚟講，即刻諗起黃生一手創立嘅寶路華球會，同埋當年同精工嘅連場大戰。

⋯⋯ 而家睇波可能只係睇英國波同歐洲波，好多人唔知， 40年前香港足球聯賽可以受歡迎到令銅鑼灣交通癱瘓，嗰段黃金歲月，黃創保可以話作出好大貢獻。
話說黃創保 76年收購咗美國寶路華錶廠，後嚟想做推廣，自己又鍾意足球，順理成章搞咗隊寶路華球隊。起初表現一般，不停換教練同買外籍球星，終於 79年升到上甲組。

之後就勁喇，同佢細佬黃創山嗰隊「永遠嘅香港班霸」精工有得踢，仲喺 81-82年、 82-83年兩個球季攞到足總盃同總督盃雙料冠軍， 83-84年球季攞埋高級組銀牌冠軍。當年亦都係香港球壇黃金期。

不過，之後香港足球式微，組班做推廣效果唔大，加上香港球壇問題多多，寶路華 84年就解散咗，唔知幾多香港足球躉，只留下無限回憶同欷歔。今年適逢精工錶 130周年，搞咗好多活動，唔知寶路華會唔會都搞吓呢又？