南華神射手馮細

man36951 · 發表於 2012-4-27 23:20:59

‎70年代南華絕對稱得上係班霸，其中1977年球季更加以全季不敗姿態封王，締造輝煌歷史。但踏入80年代，南華大不如前，更要數度護級，終在82年宣布降班，幸得足總挽留；相信標準擁南躉一定唔會忘記呢段咁大起大跌嘅往事。而見證住當時呢段歷史嘅球員，佢就係曾經兩奪聯賽神射手嘅馮志明。

華：講吓你嘅出道經過？
明：自細喺鴨脷洲球場踢波，12歲俾翟錦輝睇中踢夏令盃，之後經佢介紹入咗南華預備組，踢咗1年之後，就升上甲組做後備，當時我哋全華班真係好勁，1977年全季22場未輸過拎冠軍呀！

華：但點解幫完南華拎冠軍之後會過檔愉園呢？
明：係呀，當時「大哥瑜」同陳世九話過檔愉園，我就跟埋佢哋一齊過，當時都幾轟動呀！

華：你去到愉園之後，點解你嘅表現大不如前呢？
明：可能係新環境啦，無論練波方式、戰術都同南華好大分別，覺得格格不入咁，所以咪發揮得唔好囉，喺愉園踢咗兩年就「上返山」囉。

華：拎過冠軍，但同時你亦都經歷過降班，當時係咩感受呀？
明：真係好心痛！因為自己本身係擁南躉，加上自己有份踢，要降班真係好失望。但其實當時我哋人腳唔差，好大可能啲外援成日轉嚟轉去，一唔掂就唔要，搞到班波唔穩定，多咗外援成績反而仲差咗。

華：踢完南華、愉園之後，仲踢過咩球隊？
明：其實都好多間球會，喺南華之後我就去咗港燈，即係「南華B隊」，嗰陣有好多以前南華舊隊友，好似有大哥瑜同尹佬，不過當李嘉誠收購港燈後，就取消足球部唔玩，我跟住就去過海蜂、保濟、天天、馬天尼斯踢波，亦有喺福建同好易通做助教，同埋喺東方做預備組教練。

華：你覺得有邊位教練對你有好大幫助？
明：其實有好多呀！石哥（郭石）栽培我教我好多嘢。另外就係何應芬，嗰陣我喺港青嘅時候都學到好多嘢。仲有嘅係飛哥（吳偉文），佢嘅戰術運用得好出色，佢哋3個對我幫助都好大。

華：依家仲有冇留意本地波？
明：都係睇報紙咋，心淡到千幾零人入場就話多，以前就算南華對下游球隊，閒閒哋都有3、4千人啦，可能依家啲觀眾有好多機會睇外國波囉！

華：咁依家閒時有咩活動？
明：近呢7年得閒時做吓球證同埋踢吓南華元老隊。

後記
馮志明唔係一位簡單嘅右翼，一般右翼只會落底線斬中畀中鋒頂頭槌，但「馮細」就經常切入中路數胡，當時南華有一條入波方程式，就係陳世九後上傳中畀尹佬回傳畀「cut」入禁區嘅「馮細」入波，難怪佢可以兩次拎神射手啦！
.