周一鑊一曲成名

窮出沒注意 · 發表於 2011-12-13 10:52:41

細個嗰陣, 好鐘意睇東華籌款, 年紀越大, 就開始覺得幾無聊, 但係嗰晚真係堅, 開住電視聽到一首自己鐘的歌,.....仲以為莫華倫傷風添....原來係我哋的局長獻唱中...

轉載

「（走音 mode）誰令我心中，癡癡的醉……」一向成熟穩重嘅食物及衞生局局長周一嶽 GBS太平紳士，前晚唔聲唔聲，走咗去《歡樂滿東華》喊驚。

話說周紳士噚晚幫東華籌款，喺名為「嶽曲弦歌東華情」環節中，由東華三院黃芴南中學學生管弦樂伴奏下，獻唱譚詠麟嘅金曲《忘不了你》。

被撮圖惡搞
點知周紳士唱功實在太到家，佢一次過運用咗男高音 plus朗誦，再 crossover演繹悲劇嘅技巧去唱呢首流行曲。結果獻唱變咗惡搞。當佢皺晒眉、運足中氣唱到「只要我一息尚存，也忘不了你你你你你……」時，成首歌頓時昇華到另一個層次。高潮過後，網民嘅樂評係：「一聽難忘」，體會到天文台個寒冷天氣警告，唔係講玩。

牡丹雖好都要綠葉扶持，有網民留意到周局長忘情操曲期間，身後兩名學生表情好趣怪，有人諗起叮噹入面嘅大雄，有人大讚學生忍笑能力驚人，原因唔使講喇啩？難得節目主持人喺周局長唱完後大讚「好精采」，周局長就謙稱自己咁大個人，第一次出席咁大場面獻唱，「好緊張、亦好陶醉」。八方希望佢為官唔會同唱歌一樣，懶理大家感受囉。

每周一鑊真係唔簡單, 今次一曲成名

以上影片乃youtube提供,與本站無關; 若無法觀看,可查看原網址。