江旻憓斥資1.4萬買「世界十大名椅」有利血液循環已完成放棄外國護照

GIRLAV · 發表於 2026-4-23 11:08:40

一眾新議員上任冇耐，陸續為辦公室添置設備。立法會議員江旻憓申報買咗一張人體工學櫈，價值1.45萬，仲有「世界十大名椅」之稱呀！

翻查江旻憓嘅辦事處營運開支，截至今年3月，申請咗大約13萬「開設辦事處及資訊科技開支」。當中包括斥資1.45萬買咗一張挪威品牌HAG出產嘅人體工學櫈。根據評價，形容係「世界十大名椅」之一，話張櫈唔只有藝術感，仲符合人體工學。設計模仿馬鞍嘅獨特設計，當坐上去對腳會自然打開、下垂，上身同大髀呈110度左右，有利於呼吸之餘，更有助血液循環。張櫈仲可以由坐姿調節到半企，形容「絕對是大部分打工仔夢寐以求，最舒適的人體工學動態座椅。」

目前只得兩名員工
電腦亦係必備用品，江旻憓申請用咗大約3.8萬買咗4部13吋MacBook Air，同埋用咗大約6,000蚊買Canon相機。根據申報紀錄，江旻憓辦事處目前只係得兩名員工，每個月員工開支大約5萬。

江旻憓喺報名參選嗰陣，承認持有加拿大護照，但已經開始放棄護照程序。江旻憓辦事處回覆《am730》查詢，確認已經完成放棄護照手續。