胡楓回應同羅蘭「黃昏戀」緋聞︰好難得㗎喇 男一變電視台配角靠修嫂一句話點醒

GIRLAV

近年TVB都要轉型搞網路內容，早前就推出專訪節目《電視城內》，並由94歲嘅演藝界長青樹胡楓做嘉賓。有修哥當然要講佢同羅蘭姐近年傳出嘅緋聞。

胡楓太太呂詠荷2016年離世後，網路不時傳出修哥同幕前拍檔羅蘭發展「黃昏戀」，甚至話修哥求婚、二人秘婚等。修哥直言真係唔知呢單緋聞點嚟，「傳咗幾年，傳到而家都傳緊。不過唔緊要，93歲都仲有新聞好難得㗎喇！」。雖然年事已高，但係胡楓都知緋聞由內地傳出嚟，而且表示歡迎。「即管傳落去啦，多啲新聞仲好」。

另一個傳聞係胡楓曾經同李小龍切磋武藝，修哥承認同李小龍一齊嘅時候對方成日叫佢出手，但係一郁手李小龍可以避，所以修哥冇打過佢。有傳胡楓係李小龍嘅演技指導，修哥奉勸大家「網上嘅嘢真係唔好完全信晒呀」。

胡楓21歲時入行，第一套戲已經係男主角。到70年代粵語片息微，修哥因緣際會下加入電視台，全因出街食飯巧遇譚炳文，炳哥問佢有冇興趣做電視，當時仲有3位TVB高層在場。胡楓諗住未試過就加入《歡樂今宵》，起初唔習慣由男一變配角，後來得太太點醒話「你鍾意做就做啦！」而茅塞頓開，仲越做越開心，直言「我字典冇『退休』2個字」！

howardwo

多謝分享

ngon-9-9

修哥真係老當益壯