TVB御用宮女張韋怡告姑仔誹謗 庭上披露富二代老公每月收入

GIRLAV

曾參加2007年港姐、有TVB「御用宮女」之稱嘅張韋怡Gogo，喺2020年入稟高等法院控告姑仔潘碧玉（Jade）誹謗，並索償至少468萬元。案件於本周開審，審訊過程揭露咗張韋怡同丈夫潘德鴻以及夫家嘅家事。

張韋怡指控丈夫胞妹潘碧玉向傳媒爆料，聲稱Gogo私吞老爺100萬元，將原本用作潘德鴻夫婦兒子Ashton教育基金嘅錢「轉頭用嚟供自己到北京讀書」。張韋怡指記者將該說法寫成報導刊登，導致佢情緒激動甚至小產。Gogo指本來想去佛堂拜佛希望保住胎兒，但遇上潘碧玉，聲稱對方更向佢舉中指。

過去有報導指張韋怡丈夫潘德鴻係富二代，Gogo喺庭上透露同潘德鴻2013年拍拖兩三個月後就「見家長」，但二人只有擺酒而沒有註冊結婚。翌年Gogo懷孕並誕下兒子Ashton。張韋怡指潘父有兩名妻子，佢老公潘德鴻係二房孩子，並同意夫家富裕。法官問張韋怡老公做咩生意，Gogo話識丈夫時得知對方係「富二代」。庭上答辯提到潘德鴻每月獲家中5萬元零用錢，並指潘德鴻被報導指擁有300塊地皮係「誇大咗」。同時張韋怡承認同丈夫潘德鴻開錶行，但否認報導所指投資咗8位數，亦唔係報導指「有5個工人2個司機」咁富裕。

張韋怡作供時指認識潘碧玉後兩人成為好朋友，二人一度有如「閨蜜」，但其後兩人關係轉差及出現糾紛。張韋怡指潘碧玉甚至鬧佢「乞兒」。Gogo指Jade請嘅工人向小朋友三文治吐口水，於是解僱老爺潘父喜愛嘅工人。庭上播放張韋怡同潘父因此事而口角嘅錄音，張韋怡被辯方律師指「並非咁尊重潘老先生」，Gogo反駁指「我好錫我『老豆』（老爺）㗎喎」。

howardwo

家庭糾紛