翁靜晶19歲嫁劉家良 回望忘年戀認為男方「唔應該咁樣攞著數」 直認後悔揀錯路

GIRLAV

翁靜晶喺自己嘅youtube節目《危險人物2.0》，同同樣係十幾歲入行嘅嘉賓雪梨大爆娛圈性侵事件，原來兩位女星少年時代都曾經險遭娛圈人狼吻。翁靜晶同雪梨背景性格相似，就連感情經歷都類似 － 翁靜晶與已婚嘅劉家良師傅撻著，雪梨就同另一名武打明星徐少強交往更未婚懷孕，但雪梨原來唔知徐已婚。

節目中翁靜晶同雪梨提及過去感情事，性格率直嘅翁靜晶話曾經目睹徐少強同另一個女人一齊，有次去飲遇見生完細女嘅雪梨，居然忍唔住向老友爆料。事過境遷之後，雪梨聽返呢件事仍然可以笑笑口話記得。翁靜晶慶幸後來雪梨同徐少強分手，又感嘆當年佢同雪梨嘅感情狀況好難處理。「我地（翁靜晶同雪梨）個時仲係細路哥，大約19歲，唔係好成熟。呢班咁嘅老人（劉家良、徐少強），如果以而家角度睇，佢哋係大人，我哋係細蚊仔，佢哋係唔應該咁樣嚟攞我哋著數。就算我哋有幾鍾意你，嗰個情況係應該拒絕我哋」，雪梨亦表示認同。

翁靜晶又指佢同雪梨後來都陷入相同處境，「我地係真心真意啦，然後好快有咗細路哥，之後就走咗入一個局面走唔到架啦」，更形容係「困住咗」。翁靜晶話多次「想逃走」，但因為對方會用說話裝可憐挽留。翁靜晶直言唔想兩個女入娛圈，「因為呢班人諗嘢好唔同」。翁後來決定讀書，除咗因為要協助劉師傅處理官司，亦因為想喺困局中搵出路。

到最後翁靜晶話不時會諗行第二條路人生會唔會好啲，並且問雪梨有冇後悔同徐少強一齊，雪梨爽快表示冇，更認為人生反而冇咁精彩。反而翁靜晶表明「我後悔」，雪梨聞言反問「後悔有咩用」，翁就話「我知無用都要後悔」，雪梨回應「咁你都係搵自己嚟搞」。翁靜晶指雖然後悔但未至於要「撼頭埋牆」，但理性上都會話俾自己聽「條路揀錯，唔應該咁行」。向來有義氣嘅翁靜晶雖然後悔，但都強調佢同劉師傅後來有小朋友，劉更為佢離婚，於是只能夠行落去，並且行到最後一刻，即係劉師傅離世為止。

howardwo

陳年往事