張敬軒望摵甩「軒公」名字方健儀承認疏忽留言致歉

GIRLAV · 發表於 2025-10-22 10:44:02

張敬軒已由當年嘅「軒仔」變成「軒公」，樂於提攜後輩，直言開心見到唔少新一代歌手出現。日前張敬軒出席商場演出活動，司儀為前TVB資深新聞主播方健儀；方健儀介紹張敬軒出場：「掌聲、歡呼聲，歡迎軒公張敬軒！」張敬軒於台上獻唱多首經典歌曲，包括《幾分鐘的約會》、《青春常駐》、《青春告別式》、《櫻花樹下》等等。

張敬軒曾於YouTube頻道推出《軒公敲碗》節目，但原來佢對「軒公」名字有意見？張敬軒於活動結束後於社交平台開直播，開玩笑表示：「唉，不如大家提議吓點樣摵甩軒公呢個名，我今晚喺個台度俾Akina阿方健儀小姐嗌軒公，嗌到我，突然間有啲悶。」結果有網民截錄並提醒觀眾尊重張敬軒意願，提醒大家唔要再叫佢做軒公。當時擔任該活動司儀嘅方健儀都睇到帖文，隨即留言道歉，承認自己疏忽，應該事先確認嘉賓是否喜歡被稱呼外號，表示：「經一事蔡一智，抱歉抱歉。」網民對方健儀嘅道歉意見分歧，有網民覺得方健儀根本冇錯，唔洗道歉，認為呢件事冇必要太認真。