滕麗名老公朱建崑被指逼員工收工後上培訓「朱生話唔想浪費日間工作時間」

GIRLAV · 發表於 2025-10-3 16:40:19

滕麗名老公朱建崑（Matthew Chu）出任日資公司香港總監，但係有該公司疑似員工發文，直指朱生「逼人OT」仲要無補水！

爆料者指該公司本身返工時間已經夠早，要8:30打卡。「你以為夠早可以準時收工？朱生話唔想『浪費』員工日間工作時間，搞咗晚間收工後training，必須出席。明逼你OT，仲要無補水」。網民又指朱建崑仲話『日後會再加多啲夜晚training』，「仲話要發問卷問大家有冇人『真係』唔鍾意夜晚training。要人打份寫字樓工射足12碼」。

網民狠批該公司文化培養社畜，「你哋嘅『唔浪費時間』，根本係浪費緊員工嘅生活、健康、家庭。打工唔係賣命呀！」。有人留言指「員工唔可以愛回家，得佢老婆可以愛回家」，亦有網民唔明點解拉埋滕麗名落水。「禍不及妻兒...關人哋老婆乜事？」。

同魏駿傑嘅9年情告終之後，滕麗名經朋友介紹認識才俊朱建崑，兩人於2013年喺泰國蘇梅島舉行婚禮。婚後二人未有孕育下一代，而滕麗名就試過喺日本滑雪期間不慎喺樓梯跣腳跌斷左邊五條肋骨，更插傷肺部搞到內出血而要入院，當時朱建崑對滕麗名照顧得無微不至。