鄭秀文腰部撕裂傷坐輪椅揸柺杖休養十幾日有得著「唔好吓吓Chur到咁盡」

GIRLAV · 發表於 2025-10-3 12:37:24

11月1日鄭秀文同張敬軒將會為商台拉闊音樂會演出，正當要密鑼緊鼓預備之際，Sammi自爆早前因做gym整傷腰，要閉關休養十幾日，連社交媒體都冇出post。

鄭秀文喺社交平台交代受傷過程，「事緣十幾日前做gym 操練時，不慎傷了後腰。當時找不到自己比較相熟的骨科醫生，就去了跌打。但由於痛持續，後腰實在太重要，還是徹底照照MRI比較安心，對症下藥。MRI報告原來撕裂了兩處，難怪如此痛」。Sammi又post咗一條由醫院人員推佢坐輪椅嘅片，佢解釋「當時雖痛，但我是行到的，不過去照MRI的地方太遠，為免傷上加傷，所以護士建議我這段路用輪椅輔助」。

整親腰當然行動不便，喺另一條影片中，鄭秀文撐住柺杖，就連著件衫都扣錯鈕，佢喺片中冇厘神氣，大呻「唉，一郁到啲位好痛」。之後鄭秀文在家休息十幾日，咩都唔做專注休養，終於好返好多。「只能靜心耐心，提醒自己，以後要更謹慎」。耐心之外，Sammi亦都從受傷中有所感悟，要記得錫住自己。「以後要提醒自己，唔好吓吓Chur自己Chur到咁盡」。唔少圈中人都有留言慰問，即將同台演出嘅張敬軒就叫Sammi「唔好擔心, 健康第一，要休息好，同埋食返多啲嘢呀」。