泳兒拍新歌MV跑到嘔 搵「陽氣壯男」陪去廁所

BB29

英皇歌手泳兒（Vincy）今年第3首派台作品《老殘遊戲》正式上架，今次不玩傷感情歌，而是跟時間玩遊戲，探討人人都害怕，卻跑不掉的「衰老」課題。新歌歌名破格，是Vincy跟製作團隊對「衰老」的幽默自嘲。歌詞由黃偉文操刀，直白寫出「有個遊戲叫老得漂亮誰敢面對」，強調「格調才可以防腐永存」，至於何謂算有格調？Vincy說：「年紀大咗，經歷、智慧同修養先係最珍貴，呢啲嘢時間搶唔走。」這次音樂班底亦玩新意思，最驚喜是加插法文歌詞，監製阿道立即找來懂法文的朋友寫下 「Les rues pleines de grâce, Les raisins sont trop verts」，並且拜託朋友細心教Vincy法文讀音，Vincy再以Opera腔演繹，即時將「老殘」昇華到藝術層次。

談到拍MV趣事，Vincy即「大吐苦水」：「今次拍喪屍片，要去停車場喪跑，同導演Sheng合作咗咁多次，之前上山下海都頂得順，唯獨今次跑幾次之後真係見頭暈同埋想嘔。」原來拍攝前Vincy沒有食晚飯，跑到血糖急跌，最後要急「隊」能量飲料和扒兩啖飯先續到命，她笑謂：「今次仲要着住西裝褸喺酷熱天氣下跑，懷疑導演係特登要我還上兩個MV冇親身上陣條數！哈哈。」

最搞笑是Vincy被MV中的喪屍嚇得連上廁所都要「組團」：「真係好恐怖，所以要同事陪，仲指定要加個壯男，貪佢陽氣重嘛！」至於MV中扮演喪屍的外籍演員Carol，原來是廣東話高手，Vincy發現後笑到肚痛：「我同佢講咗一輪英文，佢突然用流利廣東話答我，呢個最嚇親我！」另一幕導演要求她揸Cam衝入店舖通知途人有喪屍，Vincy一take過投入演出，扯盡喉嚨狂嗌「有喪屍！」，令全場立即「死寂」望着她，她說：「導演話『你咁大聲嗌其實係吸引隻喪屍過嚟㗎，你唔好咁大聲叫，喺閂咗道門，然後先至正常聲量通知佢哋。』我先至Load到，係喎，我個邏輯完全錯咗，哈哈。」

泳兒 Vincy《老殘遊戲》

以上影片乃youtube提供,與本站無關; 若無法觀看,可查看原網址。

馬甸尼

新歌介紹