李龍基登台未見帶未婚妻王青霞被傳感情生變基哥回應婚期「她希望盡快被淡忘」

GIRLAV · 發表於昨天 10:45

李龍基同未婚妻王青霞(Chris)本來愛得轟烈，但係後來爆出一連串負面新聞，去年Chris因違反逗留條件、管有虛假文書等罪名，被判入獄25個月。74歲嘅基哥為愛人身陷囹圄痛哭，仲揚言「一定等佢」。守候一年幾之後，李龍基果然講得出做得到，7月王青霞出獄後，基哥喺內地口岸等候被遣返嘅愛人Chris，仲手持60支玫瑰花迎接，二人重逢一刻基哥更加激動流淚，真係感人。

不過Chris重獲自由後，二人一改過去愛得高調嘅習慣，不但未有post相放閃，甚至有網友留意到，劉雅麗喺加拿大多倫多同到當地登台嘅李龍基等人食飯，不過劉post嘅聚舊嘅照片中，竟然唔見「基嫂」！消息傳出後，有張惡搞圖喺網上流傳，以李龍基同未婚妻王青霞合照做背景，上面寫「尋妻人間蒸發清霞（青霞）回鄉失蹤基哥婚期無望」，唔通感情生變？

李龍基回應傳媒查詢時否認「Chris回鄉失蹤」講法，解釋話早前去美加登台，出發前送咗Chris返佛山嘅娘家，仲話「何來失聯」。基哥更指有Youtuber造謠，見到王青霞唔喺合照中就大造文章。李龍基曾揚言王青霞出獄後會盡快處理婚事，但基哥就未有回應傳媒幾時係婚期，只係話答應Chris以後任何事都會低調處理，對方亦希望盡快被淡忘。李龍基亦向外界大派定心丸，話佢哋而家好好，多謝關心咁話。