溫碧霞生日派對養子想錫媽咪一啖疑似被Daddy扯住衫領阻止？

GIRLAV · 發表於 2025-7-31 17:58:20

美魔女溫碧霞Irene尋日度過59歲生日，「登六」前有老公何祖光為佢舉辦生日party，養子何國倫（Xavier）當然都有出席。身為壽星嘅溫碧霞以性感連身裙「讓半球」示人，十分搶鏡。不過派對上溫碧霞老公一個舉動，就比起Irene嘅造型更惹人討論。

根據網上片段，當時溫碧霞一家三口準備影全家福，Irene養子Xavier想錫媽咪一啖，但係身後嘅何祖光突然扯住Xavier衫領，Xavier登時愣住，場面有啲尷尬。之後溫碧霞示意囝囝企喺佢側邊，並做手勢叫老公同囝囝錫佢一啖，Xavier呢次就成功向媽咪獻吻，但係Irene老公就有啲拘謹。不過喺溫碧霞小紅書post嘅一張合照中，何祖光都有同老婆咀嘴。

何祖光疑似扯個仔衫領嘅舉動，引發唔少網民討論，推測係咪唔想個仔錫媽咪；不過都有網民認為，當時何祖光似係失平衡向後跌一趺，先至扯住個仔件衫。

溫碧霞喺2000年與富商何祖光結婚，婚後一直過二人世界，直至2010年喺內地收養一名被遺棄喺火車站嘅孤兒，並為養子改名為何國倫（Xavier）。溫碧霞一直視Xavier如己出，除咗幫佢搵醫生醫病，仲經常一家人去旅行，2022年更安排Xavier到美國升學。6月時溫碧霞親赴美國見證Xavier初中畢業喺台上演講，仲喺社交網站上載有關影片。