女神配對計劃 ｜ 葉蒨文冧豬怕醜連環圖搶先睇 李芷晴細John爆笑花生樣一樣搶！

GIRLAV

第八集的《女神配對計劃》繼續是Dating Camp，除了有內容極之豐富的「心意配對遊戲」，還會出現兩名淘汰者。原來凡是未能與女神同房的求愛勇士均會跌入危險區，而掌握Foul人大權的則落在由葉蒨文（Sophie）閨密莊子璇Hilary、李芷晴（Stephanie）閨密何泳芍Honey、羅毓儀（Yuki）閨密王菲、關嘉敏（Carman）閨密莊思明、梁敏巧（Maggie）閨密鄧伊婷，及雲文子師傅組成的「閨密花生團」手上！

「心意配對遊戲」Total有五條問題，除了上集已播出的「荒島求生」題，餘下四條問題為「一齊咗幾耐可以同居」、「你理想中係會生幾多個小朋友」、「你嘅理想婚禮係…」、「如果知道自己一年之後會死，你會做啲咩？」以上五條問題既能了解女神的戀愛觀及價值觀，更能反映女神與求愛勇士的契合度，意味著即使目前勝算多高的求愛勇士，也可能因為答唔中女神心意而隨時反落後甚至被淘汰！

上集在「荒島求生」題中盡顯合拍及甜蜜一面的「國民CP」曾展望GM及Sophie，今集繼續大派閃光彈！今集，GM將再次獲得與Sophie玩親密互動遊戲機會，題目為「女神和男士需鼻尖碰鼻尖10秒，途中不能分開」。當Sophie知道要和GM有身體接觸後，即時震驚掩嘴，之後一面甜蜜的躲在Step身後瘋狂甜笑，又怕醜地攬著已原地變成Jumbo花生的Step；加上向來口多多的GM，口花花說了一句：「可以改一改個秒咯，10日！」全場即時陷入嘩聲四起（雖然只有四個人）的節慶狀態，一度驚動主持人林盛斌走入帳篷鬧爆GM：「做咩？你做咗咩賤嘢呀你？」GM則繼續不慌不忙：「冇呀，我想10秒變10日。」真真佻皮。

前奏已經咁精彩，戲肉自然不得了！就在Sophie滿面春風之際，GM Man爆拋出一句：「咁我過嚟喇。」此時，就連Hilary亦忍不住大叫：「佢兩個勁有粉紅泡泡咯！咩事呀？！」王菲亦直指Sophie個樣超怕醜。二人鼻尖觸碰一刻開始後，Sophie全程表現超緊張，中途更一度笑住向後縮，「被拋棄」的GM則望住鏡頭傻笑，畫面既粉紅又Funny。之後在一片「未有十秒呀！未夠十秒呀！」的起哄聲下，Sophie與GM鼻尖再度「重逢」，可惜多番因Sophie太激動disconnect而要「重新再嚟」。同場的細John及Step眼見GS甜得如此犯規，除露出極其搞笑的食花生樣，還Keep住起哄：「玩到聽朝呀！」、「係咯，特登嘅你一定係！」、「我好似睇咗婚禮錫十秒嗰啲咁」，二人你一句我一句氣得Sophie大叫：「你唔好加把口啦！」事後Sophie接受製作組訪問時，依然一臉冧樣，還大晒嬌俏樣隔空「問責」GM：「我覺得GM你好鬼馬呀！係咪呀，GM？！」又自認在GM面前做不了平時強勢的自己：「唔知點解GM嘅佻皮，搞到好似我都變咗小女孩咁咯。我有時見到佢笑笑吓，咁我又忍唔住就咁樣咯（邊說邊做出可愛的手指碰手指動作）。」

GM開聲護Sophie Man得嚟又搞笑

不過GM依然未有佔盡上風，更會親眼目睹Sophie與後來居上的同組勁敵林堡熙Eddie大玩傳水杯互動，GM雖即場難掩失落樣，但仍全程強顏歡笑，事後更以層遞方法連講三次「幾呷醋」：「（唯有）強顏歡笑咯，唔想散播負能量，但我本身都幾呷醋，都幾呷醋，真係幾呷醋。」雖然GM已暗藏心火，但同場的Maggie與組員劉啟進（Matt）卻聯手搞搞震刺激GM，分別將Sophie及Eddie推向對方，嚇到Sophie瘋狂尖叫。GM見狀即第一時間彈出來護花：「喂，守規則架嘛」、「Maggie你嗰吓推頭，我記得你架，我好小氣架」、「喂，唔好以為自己嗰組得一個大晒喎」，嚇得Maggie大叫：「未見過GM咁惡架。」