阿Mo李啟言出事3年首度發近照插喉傷口清晰可見 SoChing轉發回應「如果我有佢一半堅強」

GIRLAV · 發表於 2025-7-24 11:01:59

男團MIRROR 2022年7月的紅館演唱會發生事故，令舞蹈員李啟言（阿Mo）被巨型屏幕墮落擊中，至今仍然需要接受治療。事發近3年，阿Mo於7月23日周三晚更新IG，阿Mo親自發文並首度發近照。雖然照片加咗濾鏡，見唔到阿Mo嘅樣子，但係相中所見，Mo嘅喉嚨位置有相信係過去插喉留下嘅疤痕。而出事前留長髮嘅Mo，而家蓄中長度髮型。

阿Mo喺文中寫道「It's me! 琴日某眼鏡舖太子女講嘅嘢好鼓勵到我，所以分享少少最近有令我心情好的小點滴🤓順便睇吓接唔接收到大家嘅能量🤍btw, njnd, me too」。阿Mo喺post出嘅照片入面標註女友SoChing(蘇芷晴），似乎間接回應咗早前阿Mo同SoChing關係有變嘅傳聞。而SoChing都有喺個人IG Story轉發阿Mo帖文，並且寫道「如果我有佢一半堅強」。

李啟言爸爸李盛林牧師，喺兒子出事後每周撰文交代阿Mo康復進展，而阿Mo之前都有喺IG發文，但發自己照片就係首次。早前阿Mo入稟向僱主「舞館有限公司」申請僱員補償，庭上透露佢已經離開香港，到外國繼續就醫。