周驄喪禮舉行 胡楓安德尊鍾志光張國強扶靈 羅蘭憶好友一度哽咽

GIRLAV

縱橫演藝圈逾半世紀嘅資深演員周驄7月初因為肺炎而離世，享年92歲。周驄嘅喪禮7月23日早上進行，靈柩被移送到歌連臣角火葬場火化，而為周驄扶靈嘅圈中人包括胡楓、安德尊、鍾志光、張國強等。過去同周驄合作過嘅藝人如古天樂、吳彥祖、楊千嬅等都有送上花牌致哀。

喺7月22日晚設靈時，周驄多位圈中好友都有到殯儀館送別，其中同周驄相識多年嘅羅蘭，受訪時更一度哽咽。羅蘭姐話以前同周驄廿幾歲時一齊拍戲，近幾年又會拍TVB劇。羅蘭姐憶述故友時指「明白有啲病冇得醫，希望大家都保重」。

有份扶靈嘅鍾志光就透露驄叔中咗新冠入院，起初冇咩事，點知到後期又再中。鍾志光話驄叔離世前一晚佢同一班同事去探望，見到儀器不停咁跳，覺得驄叔知道佢地嚟咗。鍾sir形容之前去探望時，周驄仍然好精神，可以坐起身睇報紙。

周驄原名冼錦榮，入行前曾於餐廳及百貨公司任職，1955年被制片人發掘而入行，60年代已經成為光藝影片公司力捧小生，著名作品有《苦命女兒》、《龍鳳劍》、《癡情兒女》等。周驄70年代末一度加入TVB，到1998年再次加盟，由於當時已經步入老年，因此獲派演唔少公公爺爺級角色，例如喺《溏心風暴之家好月圓》飾演李司棋劇中爸爸鍾泛達，更入圍當年萬千星輝頒獎典禮「最佳男配角」最後五強。其他周驄演出過嘅劇集仲有《美味情緣》、《團圓》、《純熟意外》、《當旺爸爸》等。周驄喺電影《新紮師妹》演吳彥祖爸爸，詢問許紹雄「個sir字點寫」一幕成為新一代經典。2020年周驄約滿後選擇離開TVB正式退休，最後一套電視劇演出係《逆天奇案》。2016年周驄獲TVB喺萬千星輝頒獎典禮頒發「萬千星輝演藝人大獎」。

howardwo

令人惋惜！

ngon-9-9

冼先生 一路走好 R.I.P.

funnytey

周老，一路走好