羅浩楷患帕金遜症近況曝光 靠輪椅代步看淡生死 圈中出名「股神」 曾開班教人投資

GIRLAV

八九十年代TVB扮嘢能手羅浩楷，2015年因健康出問題淡出幕前就一直神隱，到2021年先接受好友鄧英敏嘅網上節目訪問，楷楷因病影響身體姿勢，唔少觀眾都感到可惜。最近有網民喺facebook群組提起羅浩楷，網民都盛讚楷楷演喜劇有一手，引起熱烈討論。有傳媒搵羅浩楷接受電話訪問，形容楷楷聲如洪鐘，但佢本人就話自己健康正在走下坡。

訪問中羅浩楷承認自己有柏金遜症，近年情況轉差，手腳活動能力唔多好，現時要以輪椅代步，日常生活由太太同工人打點。楷楷笑言因為唔啱就買過部，於是而家有6架輪椅，更不時喺屋企樓下平坐輪椅「飛車」。4年前嘅訪問中，羅浩楷都有彈下結他jam歌，而家佢都仲有維持，仲會唱下歌錄下音。不過抱恙多時，羅浩楷直言「有病唔醫架啦」、「我都唔知幾想死」。

入行多年嘅羅浩楷70年代起活躍演藝圈，加入TVB後被安排參與《歡樂今宵》演出，擅長模仿明星藝人，有一次扮梅艷芳更令到沈殿霞同何守信忍俊不禁。楷楷另一拿手好戲就係演公公，《皆大歡喜》演嘅凌零發係其中一個經典角色。不過喺2004年拍《皆大歡喜》時，羅浩楷因心絞痛入院，經診斷為大動脈閉塞。到2016年羅浩楷因椎間盤突出令佢冇法挺直身子，變成嚴重駝背，加上頸椎受壓，楷楷需要戴頸箍同坐輪椅，醫療開支試過一年一百萬元。

2017年羅浩楷因健康未有改善而離開TVB，好在楷楷係圈中出名嘅「股神」，透過自學而掌握投資技巧，由喺廿幾年前「沙士」期間輸足一層樓，到而家搵到收入同寄托。原來羅浩楷多年前曾經開班教人投資，連余慕蓮都問佢拎貼士！

howardwo

看淡生死

ngon-9-9

祝羅先生早日康復