黃日華神隱多時為李珊珊受訪 談唔再拍劇原因︰佢睇唔到，咁我仲做嚟做咩？

GIRLAV

曾受情緒病困擾多年嘅李珊珊近期重新出發，主持youtube直播節目《珊珊大爆發》，最新一集請來同樣少有露面嘅黃日華做嘉賓。李珊珊同黃日華雖然有年齡差距，但係交情甚深，一見面就嚟個擁抱。曾經話過唔會再做直播訪問嘅黃日華，直言係因為珊珊復出，於是破例受訪。

黃日華同李珊珊雖然好friend，但原來喺TVB並冇合作過，直到二人離巢先喺有線一齊拍劇。至於點認識，李珊珊憶述1996年當選港姐後，有日喺清水灣電視城經過canteen，遇到拍緊《O記實錄》第二輯嘅黃日華。珊珊話「你（華哥）突然hi我，你知我啱啱入行，走過嚟同我講咗一句說話，我記到今日。」華哥對此毫無印象，珊珊於是開估「『千祈唔好信任何人！』。」黃日華解釋當日點解咁講，係因為「瀨得嘢多，經驗之談！」

奇就奇在當時黃日華同李珊珊唔算相熟，珊珊形容自己「甜筒」，所以好感激。「我當時真係咁嘅狀態，可能你覺得我要學識保護自己」，華哥就認為「呢個係前輩應該要做嘅嘢，我入行多你咁多年，遇到過好多問題，見過好多嘢，始終都有啲經驗。」

直播前黃日華同李珊珊都收到雪妮老公唐佳逝世消息，相當痛心。華哥曾經飽歷喪偶之痛，太太梁潔華同樣做過TVB藝員，惜於2020年因血癌逝世。梁潔華患病時，黃日華日以繼夜照料，冇同朋友見面，而且喺醫院留到夜深陪太太，第二朝又去醫院。不過摯愛始終難敵病魔，處理完太太後事，黃日華開始胡思亂想。「一個人喺房就開始諗，點解會咁樣？點解個天咁樣對我？唔畀我一個好嘅結果？佢（太太）講過好想退休後一齊孭住背囊去環遊世界，覺得好開心，好想做呢件事。但點解最後做唔到？」呢種狀態維持咗大約兩個月，同黃日華同屬「五虎將」嘅苗僑偉不時問候，將華哥從低谷拉返上嚟。「三哥keep住搵我，叫我出嚟飲茶，約我去佢屋企食飯傾偈，叫我唔好成日匿喺屋企，要見下人。多得三哥三嫂，喺我最低谷時候拉返我上嚟，好多謝佢。」

拍過無數劇集嘅黃日華，近年甚少參演劇集或電影，對上一次已經係2017年客串電影《追龍》。華哥親自解釋點解唔再拍戲，原因同太太有關。「太太係我頭號fans，每次佢睇完會畀意見，因為佢分析力好強，我先有進步。自從佢走咗，睇唔到我做戲，咁我仲做嚟做咩？」。未有復出之意，黃日華直言本身唔係咁鍾意做呢行。「唔係咁大戲癮。加上經濟唔算有壓力，冇影響之後生活，就當休息下。」

howardwo

有咁嘅樹！