網民嚴選「10大最美香港小姐」 57歲港姐被讚與兒子似情侶多過兩母子？

GIRLAV

香港小姐競選係每年盛事之一，過往出產咗唔少「美貌與智慧並重」嘅港姐。6月24日香港小姐初選展開，一眾參選佳麗初次與傳媒見面。唔少網民認為近年港姐質素每況愈下，氣質與美貌皆似不如上一代港姐。日前有網民於討論區搞咗個選舉，票選「10大最美香港小姐」，一齊睇一睇名單啦！

第10位：朱千雪
朱千雪於2012年參選香港小姐競選，被指係冠軍大熱，因為決賽當日嘅投票系統出現故障而大熱倒灶，僅獲得季軍，不過就獲網民貫以「民選港姐冠軍」之稱。當年未卸任嘅朱千雪已深受網民愛戴及被TVB力捧，但與醫生老公吳昆倫結婚後選擇淡出幕前，向TVB請假一年到校園進修，其後更到城市大學修讀法律博士學位，2020年轉行做大律師及擔任講師，及後升格成為實習大律師嘅師父。2024年，朱千雪誕下兒子，上月佢就透露對幕前仍感興趣，已與TVB續約，表示公司無論讀書或做法律工作都畀好多空間佢，有嘢做會問佢得唔得閒，算係自由，指公司好尊重佢啲時間。

第9位：謝嘉怡
謝嘉怡（Lisa）為中英混血兒，擁有深邃輪廓，2020年以大熱姿態勇奪香港小姐冠軍及最上鏡小姐，成雙料冠軍。謝嘉怡參選香港小姐前曾喺蘇格蘭任職手術室護士，成為港姐簽約TVB後主要被安排參與綜藝節目，包括出演《不可能任務2》、《好聲好戲》等等，曾於《愛．回家之開心速遞》飾演「呂冠君」一角及《新四十二章》客串演出。謝嘉怡近年就轉型做女強人，除咗豪擲100萬元投資健康飲品生意，又與朋友投資數碼名片生意，於香港開設總部辦事處，仲曾經喺中環市集擺檔，親身上陣做生招牌。

第8位：楊思琦
楊思琦2021年參選香港小姐，勇奪冠軍、最上鏡小姐、網上最奪目小姐、纖體美態獎、最甜美笑容佳麗獎和最修長美腿佳麗獎，以「六料港姐冠軍」簽約TVB；獲TVB力捧，先後演出《無名天使3D》、《人生馬戲團》、《巴不得爸爸》、《隨時候命》等多部劇集。2011年，楊思琦與李家鼎細仔李泳豪拍拖9年分手，又被爆未婚生女，漸漸淡出幕前，及後轉戰內地市場，努力嘗試不同嘅工作，例如登台、經營內地社交平台拍短片、開直播及出席活動等等。

第7位：李綺虹
1994年香港小姐季軍李綺虹當年未卸任就被安排於當年台慶劇《阿SIR早晨》擔正女主角，與黎明、古天樂演出。其後愈戰愈勇，先後出演《衝鋒隊怒火街頭》、《神偷諜影》等多部電視劇及電影， 亦因飾演1995年版《神鵰俠侶》中「郭襄」一角被封「最美郭襄」。李綺虹與外籍老公於2004年結婚並定居加拿大，育有一子，逐漸減少幕前演出，專心相夫教子及任職精神科護士。李綺虹曾多次於社交平台貼出素顏自拍照，大方展現面上雀斑及眼紋、頸紋，更直認皮膚瑕疵係因為更年期，唔少網民留言大讚李綺虹為人真誠，並指欣賞佢有展露真實狀態嘅勇氣。

第6位：佘詩曼
佘詩曼係1997年香港小姐季軍，簽約TVB後開展電視劇生涯，初初拍劇俾人話唔識做戲及雞仔聲等等，不過憑住佢個人嘅努力，最終以《金枝慾孽》、《鳳凰四重奏》、《絕代商驕》、《天與地》、《使徒行者》等演出獲得觀眾讚賞，成為當家花旦。2023年，佘詩曼回巢拍攝劇集《新聞女王》，憑「Man姐」文慧心一角，以大熱姿態奪得「最佳女主角」、「馬來西亞最喜愛TVB女主角」」及「大灣區最喜愛TVB女主角」，成為TVB史上首位三屆視后。

第5位：吳婉芳
吳婉芳1986年參選香港小姐競選，勇奪亞軍、最上鏡小姐及才華小姐，曾推出個人專輯做樂壇新人。1993年，吳婉芳與商人胡家驊結婚結束7年愛情長跑，並於婚後淡出娛樂圈，先後誕下兩子一女。喺今年嘅母親節，二仔胡智同於社交平台PO出與吳婉芳慶祝嘅片段，意外曝光媽媽素顏模樣，不過其皮膚狀態非常好，近乎零無孔，吳婉芳又被網民指似情侶多過兩母子。

第4位：盧淑儀
盧淑儀喺1992年參選港姐，獲得冠軍、最上鏡小姐及二十週年金輝大獎；之後參加國際華裔小姐獲得亞軍。佢喺當選冇耐就同對佢一見鍾情嘅李克勤拍拖，之後更退出娛樂圈。二人喺2006年拉埋天窗，先後誕下兩名囝囝Ryan及Rex，結婚多年恩愛如昔。

第3位：蔡少芬
蔡少芬於1991年參選香港小姐奪得季軍入行，加入TVB後隨即被受力捧，先後拍攝《金牙大狀》、《異度凶情》及《壹號皇庭V》等多套劇集，1998年憑《天地豪情》勇奪視后，2010年轉往內地發展，憑內地劇《後宮甄嬛傳》「皇后」一角人氣再度急升，2016年回巢TVB拍攝《老表，畢業喇！》。2008年，蔡少芬與張晉結婚，又因專注於內地發展，曾舉家搬到上海居住，但2022年為照顧年邁父親，一家五口由上海搬回香港居住。

第2位：郭藹明
郭藹明以當年碩士生身份參選贏得1991年度香港小姐冠軍，國際親善小姐及最佳談吐幽默獎；之後參選1992年國際華裔小姐競獲得亞軍及最佳民族扮相獎。喺入行後，郭藹明參演過唔少經典劇集，例如《大時代》、《刑事偵緝檔案II》、《狀王宋世傑》及《天地豪情》等等。佢喺1998年下嫁劉青雲後便淡出娛樂圈，佢哋一向十分恩愛，係娛樂圈嘅模範夫妻。

第1位：李嘉欣
李嘉欣係1988年度香港小姐冠軍、1988年度國際華裔小姐冠軍。加入TVB後，李嘉欣亦有參演劇集拍攝，當中最為人熟悉嘅係《原振俠》，之後佢就轉戰電影圈，拍咗唔少膾炙人口嘅電影，例如《倩女幽魂2之人間道》、《鹿鼎記II神龍教》、《妖獸都市》及《墮落天使》等等。去到2008年佢同許晉亨結婚，2011誕下兒子Jayden Max。近年佢不時上載生活照到社交網站同網民分享，凍齡有術嘅佢樣貌或身材都keep得好好。

howardwo

光陰似箭……