何雁詩激罕回應網民「有報應」言論：唔想同網上鬧人嘅人同一個Level

GIRLAV

何雁詩（Stephanie）和鄭俊弘（Fred）於2017年機場拖手公開認戀，由於當時有傳鄭俊弘背未婚妻搭上何雁詩，何雁詩因而被貫以第三者之名，戀情不被睇好；鄭俊弘則曾被傳媒影到為愛犬戴釘帶，惹外界質疑佢虐狗，形象下滑。2020年，何雁詩和鄭俊弘結婚，婚後育有一子鄭讚廷（Asher），二人公開Asher於1歲半時經專家評估確診患上罕見遺傳病「天使綜合症」，被網民留言Asher患病係「報應」。日前，何雁詩接受前主播方健儀YouTube頻道訪問，激罕分享面對網民負評嘅心態：「我唔想同嗰啲喺網上鬧人嘅人同一個Level。」

何雁詩於訪問中分享當時知道Asher確診天使綜合症嘅反應，指自己比鄭俊弘冷靜，坦言當刻問醫生有咩可以做到或有咩機構可以聯絡；亦透露喺懷孕時有做足產前檢查，但因為婦科醫生指天使綜合症數據實在太少，因而冇辦法100%準確。何雁詩分享有唔少人都叫佢將小朋友嘅嘢低調，何雁詩回應指當佢和鄭俊弘選擇去公開兒子患病時，已預計一定有唔好嘅言論，透露初衷係希望更多人認識天使綜合症，令社會對罕見病有更多支持：「人哋成日叫我小朋友嘅嘢低調啲，但係我係唔會㗎，OK？好多人就話：『個仔有問題你就收埋佢啦』，好多嘅，但係我知道我自己點解要咁做囉。」方健儀提到網民嘅辛辣言論，何雁詩回應指：「網絡世界畀好多人好多Power去講你，當你諗起呢個人喺街到突然間衝上來講：『報應啊』，你會點對佢？你唔會理佢，因為你又唔識我，你衝埋來突然鬧我，我冇理由同你拗，我唔係一個會咁樣講人嘅人，所以我唔想同嗰啲喺網上鬧人嘅人同一個Level。」

對於當年被指係第三者，何雁詩表示明白點解有啲人對佢哋有呢個睇法：「因為佢哋對我哋嘅了解就係喺報章上面，咁報章上講嘅嘢當然唔係我哋嘅全部啦。有好多控制唔到嘅嘢，我無謂再去深究，我控制到嘅嘢就係我嘅家庭開唔開心，家人健唔健康，自己係咪開心。」對於旁人負面評價，何雁詩坦言有時都會唔開心，但就會為自己設定一個限期，因為覺得太晒時間，認為用唔開心嘅時間其實已可以做到好多嘢。何雁詩和鄭俊弘曾於去年底帶同Asher遠赴美國接受為期3星期嘅密集治療，指兒子喺課堂中可以於跑步機上享受快樂、結交咗新朋友及學會用叉子食飯，而Asher即將可以到特殊幼稚園上學。

howardwo

陳年戀事