《女神配對計劃》林俊其向羅毓儀表白粉紅泡泡滿溢 年初曾與梁超怡傳緋聞

GIRLAV

由「金牌媒人」林盛斌（Bob） 主持嘅TVB全新戀愛綜藝真人騷《女神配對計劃》成為近日熱話，節目為「東張女神」梁敏巧、「《愛回家》女神1號」葉蒨文、「《愛回家》女神2號」李芷晴、「扮嘢女神」關嘉敏和「童顏女神」羅毓儀公開搵男友；6月15日播出嘅第二集再有男藝員化身參賽者向女神公開表白，佢就係有「翻版王浩信」之稱嘅林俊其（Kris），佢勇敢地向暗戀多時嘅羅毓儀（Yuki）表白，粉紅泡泡滿溢。

藝人林俊其化身編號「295」參賽者，向羅毓儀公開表白，並透露一早已經偷偷暗戀佢：「我曾經同佢相處過，我覺得佢每做一件事都會好驚、同埋都會諗好多嘢，所以就阻住咗佢行前一步。但我想講你相信自己就可以；同埋如果可以嘅話，我想做你輔助。」更表示：「因為我覺得Yuki係一個需要多啲陪伴同鼓勵，我希望佢可能鍾意睇戲、睇動漫，又或者鍾意食某啲嘢，佢都會陪咗佢先。我希望之後如果你有好多煩惱，或者你做嘢方面嘅嘢，我會想一齊同你研究，一齊去進步，希望有呢個機會」。Yuki聽完之後即刻感動到眼濕濕，最終更將小鮮肉對象叮走，將寶貴嘅追求機會畀Kris，並為佢戴上心動頸鍊。

現年29歲嘅林俊其喺2018年入讀無綫短期藝員訓班後加入TVB，由於佢無論外貌、身形定係聲線都同王浩信好似，所以曾喺劇集《兄弟》《反黑路人甲》及《踩過界II》中飾演其角色嘅年輕版及替身。而佢喺2020年《愛·回家之開心速遞》仲飾演「Signal」藍浩信而備受網民關注，之後再憑《反黑英雄》飾演古惑仔「番茄」，成功入屋！

喺今年2月，林俊其被傳媒影到與2022年港姐季軍梁超怡著「白色情侶裝」喺尖沙咀拍拖撐枱腳，男方除咗細心幫女方影靚相之外，二人全程有傾有講，女方仲笑聲不絕，猶如熱戀中嘅小情侶。不過其後二人雙雙否認戀情，男方強調二人只係好朋友關係，而女方亦有發文澄清二人唔係情侶關係，只係好兄弟。

howardwo

女神被追求