前「TVB御用師奶」黃鳳琼大談昔日演藝生涯爆曾遭換角質疑自己可有可無

GIRLAV · 發表於 2025-6-17 10:56:46

香港資深藝人黃鳳琼為前「TVB御用師奶」，曾就讀演藝學院1年及做過1年體育科教師，之後喺1988年參加TVB《銀河接力大賽》入行，出演過逾百部電視劇集；10年前離開HKTV並帶同三名子女移民加拿大多倫多，及後低調離婚。日前黃鳳琼接受楊英偉YouTube頻道訪問，大談昔日演藝生涯。

黃鳳琼過往所飾演嘅角色多為閒角，戲份唔多，除咗演師奶比較多，黃鳳琼透露最初演最多嘅係另一類角色：「我哋呢啲有句難聽嘅說話（形容），唔係做丫髻就係做雞，因為嗰個年代好多風月場所，電視台都係反映嗰個時代背景嘅嘢。」黃鳳琼又表示曾因爆騷而遭換角，令佢質疑自己係咪可有可無，求其換成第二個演員都得：「其實我真係唔係好掂，反省自己都冇乜特別長處，人哋一定要用你。我明娛樂圈好講際遇，當時唔舒服嘅係，如果你做得好一定會有人睇到，但我一直等唔到呢啲機會，我就諗一定係我做得唔夠好。」

不過黃鳳琼亦曾有過一些令人印象深刻角色，包括《大時代》丁蟹（鄭少秋飾）老婆、電影《九品芝麻官》婉君表妹及《唐伯虎點秋香》唐伯虎老婆。黃鳳琼分享，喺周星馳未紅嗰陣已認識對方，仲叫佢做星仔：「大家有返咁上下你先會行埋一堆，即係我入行嘅時候，我唔會走埋去痴住劉嘉玲，你明唔明呀？人哋有身份地位，大家唔同……但嗰陣時星爺，我哋叫佢做星仔，佢仲做緊《430穿梭機》，會傾計、一齊玩。」續指，周星馳獲公司賞識拍劇，喺佢有份演出嘅劇集，黃鳳琼幾乎全部都有份，而後來周星馳出去拍電影，都有搵黃鳳琼客串，佢就表示雖然只係幾組戲但都好開心。不過，漸漸就冇再搵佢，令佢又再懷疑自己：「係咪我做得唔好呢？」楊英偉則在旁安慰，表示有機會係周星馳離巢後改由電影公司選角，並認為黃鳳琼係有演技之人。

現時黃鳳琼於多倫多擔任陪月員，佢透露當時係因為移民初期有成3年冇工作，最後被朋友勸搵工，因此去考咗個陪月員資格。黃鳳琼分享指喺做陪月員呢6、7年期間，差唔多有40個BB經佢手，最開心係有時啲客會send返啲小朋友生活相畀佢，認為係一份幾開心嘅工。