潘宗明回港聚舊見齊汪明荃胡楓梅小惠 娶天氣女郎太太多得阿姐？

GIRLAV

66歲嘅前TVB主持人潘宗明，90年代移居加拿大多倫多之後，一直喺當地華人電台做節目主持，並且不時同太太許加恩出國旅行。早前人稱潘sir嘅潘宗明去內地旅行，並且順道回港探朋友，尋日梅小惠就喺社交平台post出同潘宗明及胡楓聚會嘅合照，更寫道「#EYT鋤D群 #三缺一 #獨欠阮兆祥」，似乎幾位當年做綜藝節目《歡樂今宵》期間靠鋤D增進感情。

日前阿姐汪明荃都有post出同潘sir夫婦嘅合照，並寫道「舊同事潘宗明和太太往內地旅行，經過香港特別來工作室探我。自疫症後多年冇見，大家別來無恙，風采依然」。潘宗明伉儷同阿姐汪明荃大有淵源，潘sir曾經提到佢同太太多年前一齊喺TVB體育組工作，1986年潘為南韓漢城（現稱首爾）亞運會做主持，阿姐係亞運大使所以都有去當地，而許加恩就負責擔任阿姐助手。點知工作期間許加恩唔見手袋同護照，潘宗明留喺漢城協助，其餘大隊就返香港。就係咁，潘宗明同許加恩擦出愛火花，2年後結婚更加揀首爾度蜜月。潘宗明夫婦一向視阿姐係佢地嘅紅娘，每次回港都會見面。值得一提係，許加恩多年前為TVB擔任天氣女郎，顏值唔錯架。

去年多倫多華人圈爆出潘宗明突然向合作廿幾年嘅加拿大中文電台辭職，而潘sir亦喺facebook出post暗示走人。電台高層喺潘sir原有節目時段公布辭職消息，聲稱潘不再以節目提供者形式合作。潘宗明辭職消息塵埃落定之後，有網民問及辭職原因，潘留言回應話「不受尊重, 想開枝散葉, 為自己留低更多作品(babies) it's perfect timing」。同年潘宗明過檔多倫多另一中文電台，同台DJ包括前港姐陳倩揚、李司棋女兒葉子青等。

做DJ以外，潘宗明不時以星級導遊身份帶隊外遊，太太亦同行隨團。潘sir分享唔少旅途相片，見到潘氏伉儷日日都以情侶裝示人，潘宗明嘅招牌濃密髮型依然keep得好好。

ngon-9-9

頭髮重係烏黑濃密