周嘉洛為Chantel 新歌扮女人 網民讚靚過王祖藍：扮陳瀅定熊尚善？

GIRLAV

姚焯菲（Chantel)推出新歌，宣傳影片竟然多咗個神秘「女星」，唔通TVB有新嘅女藝人？睇真啲，原來係最近被影到喺陳瀅屋企樓下出入嘅周嘉洛嚟！唔少網民都大讚周嘉洛呢個女性造型「好有女人味」，可以挑戰王祖藍扮女人，更有人估佢嘅造型參考邊個女星，「係唔係扮緊陳瀅」或是《愛回家》嘅角色熊尚善。

姚焯菲（Chantel)全新單曲《New Fantasy》挑戰型格舞曲，拋低喺大家心目中嘅「小公主」純情形象，昨日佢同周嘉洛喺社交平台發佈聯合影片，片中Chantel以新歌嘅宣傳造型亮相，非常之有型，而另一個吸引觀眾眼球嘅地方，係Chantel隔離有個著一身黑色裙嘅長髮「女士」背影，當呢位「女士」轉身，原來就係周嘉洛！佢哋一齊向鏡頭擺甫士，仲互望對方，真係夠哂fantasy！

今年Chantel參與《愛·回家之開心速遞》演出，年初時以熊家遠房親戚角色亮相，上月正式登場，係金城安（周嘉洛飾）嘅「表妹」，近日亦同飾演熊樹仁嘅豹哥單立文有唔少對手戲，網民都讚Chantel演出自然，而佢亦同「表哥」周嘉洛結緣。

網民對於周嘉洛嘅女性造型都大讚扮得好似，紛紛表示「十分嬌艷」、「靚過好多女星」，可以挑戰以扮女人神似嘅王祖藍「慳啲啦baby」造型，亦有人話周嘉洛為咗幫Chantel 宣傳新歌，由「表哥」變扮「表姐」係好有愛！更有人估周嘉洛呢個黑色裙造型，係參考邊個女星，「係唔係扮緊陳瀅」（周嘉洛緋聞女友），或是係《愛回家》入面「廢青安」金城安嘅母親熊尚善（滕麗名飾）？

無論如何，網民對於周嘉洛扮女人都非常受落，唔知TVB會唔會順應民意，順勢推出《愛回家》新角色，俾周嘉洛真正扮「表姐」呢？

howardwo

嘅…………