|
|
因主持「六合彩」開獎而家傳戶曉嘅資深藝人夏春秋（冬叔）離世，享年93歲。冬叔女兒吳君如喺社交平台發文宣布噩耗，而冬叔兒子吳君祥前妻江美儀都有出post悼念。
江美儀前晚喺網上節目《娛樂好好玩》提到前老爺冬叔逝世一事，直言自己都係從君如發文先知道消息。江美儀提到近年夏春秋身體狀況麻麻，原來冬叔生前一段時間每周需要入醫院洗腎2次。同冬叔關係好好嘅美儀同時透露，之前曾經同前夫吳君祥聯絡並問候冬叔情況，吳君祥回應美儀話爸爸多數都係喺屋企休息。
夏春秋生前對江美儀相當愛護，而美儀喺節目中提到佢同冬叔都係9月20日生日，以往會一齊慶祝。冬叔離世，江美儀認為前老爺留低嘅係令人開心嘅印象。「佢永遠都好開心，唔會見到佢唔開心，或者好『忟憎』，成日都笑騎騎，再唔係就講笑話畀我哋聽……佢留畀我哋嘅就係佢嘅開心，都係送畀我地好好嘅禮物。我永遠記得佢嘅幽默、佢講嗰啲鹹濕笑話。」 |
|
在線雷達
發表於 2025-3-19 14:01:32
廣播
置頂
推舊帖
收嗲鳥
油顏色
