愛回家｜網絡流傳演員每集人工「金城安」人工第三高最低竟然係$0蚊？

GIRLAV · 發表於 2024-12-30 17:25:48

TVB處境劇《愛·回家之開心速遞》自2017年播出至今已超過2500集，劇情輕鬆搞笑又溫馨，深得觀眾喜愛，唔少藝員更憑劇中角色成功入屋。近日網上流傳一張《愛·回家》演員每集人工嘅圖片，隨即引起網民熱烈討論。

近日網上流傳一張《愛·回家》演員每集人工嘅圖片中，唔少劇中演員嘅人工都有列出，而當中每集人工最高$22750嘅就係曾客串嘅歐陽震華，之後就輪到「熊樹根」劉丹嘅$6000、「金城安」周嘉洛嘅$5750及「熊樹仁」單立文嘅$5500，而最低嘅係$0嘅「龍舟」何晉樂。

唔少網民見到演員每集嘅人工後都議論紛紛，例如「唔係好信咁計拍一集咪成10萬以上？拍呢啲劇就係想低成本點會咁揼本呢」、「一睇就知假」、「可信程度不高」、「冇$收果位系義工？」、「何晉樂冇人工？」、「點解會有$0？群姐只有$750」、「0蚊係咩事，貼錢返工？」、「素素自己出埋資做金主點會5000 負唔知幾多錢就差唔多」、「5000果位女乜料？多過大小姐？」、「群姐應該唔止咁少，咁多人鐘意睇佢」、「同工不同酬，「素素」個價仲多過洪家姊妹同大小姐⋯⋯」、「根叔拍足一星期係咪淨袋42000」及「流料，5舊水一集邊有人做啊」等等。