|
|
53歲何婉盈於1991年參選香港小姐五強止步，但亦成功被TVB睇中簽約入行，先後被安排主持《勁歌金曲》、《新秀》等節目，以及《妙探出更》、《孤星劍》等劇集，2001年與商人傅大全閃婚，不過婚姻僅維持一年半；及後與男友未婚懷孕，分手後堅持誕下女兒並獨力教養。日前何婉盈於社交平台分享女兒獲香港大學取錄，睇嚟何婉盈終於苦盡甘來。
何婉盈曾任馬會公關、股票投資經紀、兼職歌手和司儀，曾於接受倪詩蓓主持嘅新城電台節目《詩情廿四味》訪問中透露與女兒生父關係良好，因為唔想女兒成為父母間嘅磨心，於是唔會阻止女兒與佢父親見面，並認為身教對女兒嘅成長十分重要，從女兒13歲開始教佢理財，每星期畀佢20元，用剩餘錢買文具。何婉盈日前於社交平台分享多張照片，包括女兒嘅背影照，以及香港大學conditional offer嘅通知書，指女兒圓咗自己嘅夢想：「女兒收到香港大學的 conditional offer！她，圓了我的夢想。一直以来，我也很希望她會成為我們家第4代，有資格入香港大學。女兒從小我就跟她説。你太爺，你公公，你媽媽也是香港大學畢業。希望你可以順利考入香港大學完成我們家120年香港大學夢。她從小就跟我説，媽媽我一定會好努力完成你的夢想。今天，她終於圓了我的夢。我真的很感動，熱淚盈眶。女兒，多謝你的努力。媽媽愛你。我相信我在天上的爸爸也很安慰他的孫女考入了跟他一樣的大學。」又指，除咗自己爺爺、爸爸，其實大伯、二伯、五叔、兩個堂細佬都係畢業於香港大學，有醫生、土木工程師、工商管理學士、則師，可謂學霸世家。
何婉盈提及對於數年前一個訪問耿耿於懷，直指當年報導佢話人生好後悔為結婚而結婚，為生仔而生，但其實之後仲有句說話，只係對方無報導，並歪曲佢嘅意思，指多年來從未有喺自己嘅平台解釋過，但現時需要為呢件事情解釋一下：「就係我話我當年35歲，知道已經係高齡產婦，所以好希望生，所以為生而生，生完之後，我一生人，覺得最好，最正確嘅決定，同埋最䦕心嘅事情就係生咗我呢個女。但這段冇報導，cut晒，淨係歪曲我嘅意思，標題話『我好後悔，為生而生咗呢個女』。」何婉盈希望以呢個帖文為証，直言：「女兒係佢一生中最大驕傲，我生佢，係我一生中做得最啱嘅事。」 |
|
在線雷達
發表於 
廣播
置頂
推舊帖
收嗲鳥
油顏色
