阮浩棕直認與緋聞女友何沛珈「了解中」 唔介意情侶檔商演搵真銀

GIRLAV

TVB劇集《異空感應》正在熱播中，阮浩棕、譚凱琪、何沛珈及羅毓儀等劇中演員齊齊現身為劇集宣傳，而男女主角陳家樂同陳曉華就有工作在身未能出席，不過亦以視像形式感謝觀眾支持。

緋聞情侶阮浩棕及何沛珈分別獲提名「最佳男配角」、「最佳女配角」及「飛躍進步男、女藝員」獎項，被問到喺頒獎禮奪獎嘅信心時，阮浩棕就表示平常心，最重要係大家繼續追看《異空感應》，如果觀眾鍾意劇集及劇中角色，自然會投票畀佢哋；而何沛珈就話自己今年有三個提名，佢覺得要對自己有信心。

阮浩棕及何沛珈被問到如果得獎會唔會順手公布戀情，阮浩棕就扮聽唔明話「公布啲咩呢？我唔知你公布啲咩？公布攞獎係唔係呀？」之後，佢同何沛珈都異口同聲話仲了解緊。

仲有兩星期就到聖誕節，當佢哋被問到會唔會以情侶檔身份出席商演搵真銀時，何沛珈就話未有人搵佢做聖誕活動，歡迎大家邀請佢。至於介唔介意情侶檔，何沛珈就表示唔介意，一個人或者兩個人都冇問題。佢再話自己喺聖誕節期間要返大陸拍劇，而阮浩棕就話忙劇集宣傳。之後何沛珈口快快話喺深圳拍劇，要分隔兩地。

howardwo

電視劇情