被王晶踩戲屎李婉華反擊大爆被刪戲真相︰有人臨時要求大膽演出

GIRLAV · 發表於 2023-6-7 11:04:14

李婉華日前喺自家YOUTUBE頻道嘅節目《豪華博客》，同身在英國嘅林子博及喺加拿大嘅杜挺豪，一齊討論TVB劇《一舞傾城》。李婉華鬧爆劇集入面KK(陳星妤飾)出賣初夜情節，認為教壞細路。而《一》製作人王晶就喺內地微博出post大反擊，形容李婉華係「過氣四線」，「晌TVB都屎戲之王」。晶哥又話多年前曾經搵婉華拍戲，但係「用過一次嚇到剪左大半」。

王晶發炮後，李婉華同林子博及杜挺豪再次開live，仲搵埋娛記小文做嘉賓。李婉華佢地再次回應，認為上次批評《一舞傾城》係對事唔對人。對於被王晶鬧「戲屎」兼剪走戲份，小文提到當年婉華拍過王晶有份嘅《制服誘惑2地下法庭》，戲中有裸露鏡頭，但係小文同行家都認為有移花接木之嫌。

婉華憶述傾《制》嗰陣本來冇要求佢做咁多嘢，但係套戲上畫後有人問佢係咪裸露，婉華就立即否認，仲話「嗰個唔係我」。李婉華就仲大爆當年開工前一日收到電話，要求佢有「大膽演出」，連劇本都冇咁嘅戲份，當時婉華拒絕，仲搵曾志偉求助，最終李婉華唔駛「大膽演出」。而電影出街後有好多裸露場面，婉華否認係佢上陣，林子博追問「即係用替身？」，婉華就話「我諗係嘞」。

小文由此推斷，王晶之前提到要剪走李婉華大量戲份嘅電影，正是《制服誘惑2地下法庭》，而唔係另一套有劉德華同梁家輝主演嘅《至尊三十六計之偷天換日》。小文又大爆李婉華唔係第一個遇到呢類事，當年朱茵拍《強姦2制服誘惑》亦係半推半就之下要拍大膽場面，搞到好唔開心。