【Missing Terry Hall, Will Always Thinking Of You】

opiumjeon · 發表於 2022-12-20 21:12:31

本帖最後由 opiumjeon 於 2022-12-20 21:29 編輯

【Missing Terry Hall, Will Always Thinking Of You】

text: 字裡知音人 Jansen's Here

.webp

R.I.P., Terry Hall (19 March 1959 – 18 December 2022)

朋友今早告知 Terry Hall 逝世不幸消息，心裡酸酸的十分傷感，然後腦裡馬上諗起第一次認識佢音樂嘅Moment ── 喺亞視《周日音樂快線》睇到樂隊Terry, Blair & Anouchka嘅MV《Missing》，「The rain is falling / And I've tried calling / But I just can't get through to say I'm missing, missing you」。流麗而流暢流行調子，一首令人一聽就會愛上嘅Pop Song。但當年家中只得卡式機，外國樂隊音樂人嘅Cassette非常難買，直到後嚟，先慢慢認識Terry Hall呢位百足咁多爪、音樂風格非常多元化嘅英倫音樂人。

.webp

Terry Hall一開始加入 The Specials ，樂隊崛起於Punk年代，但玩Ska，非常別樹一格。名作《Ghost Town》，相信好多英倫樂迷都好鍾意，包括我。自2014年開始，我已發現呢首歌非常切合形容香港：「This town is coming like a ghost town / Why must the youth fight against themselves? / Do you remember the good old days before the ghost town?」其實首歌係描繪80年代初英國各地混亂不堪情況，世道崩壞，自然群魔亂舞，變成鬼城。

離開The Specials後，Terry曾組成Fun Boy Three、The Colourfield、Terry, Blair & Anouchka、Vegas等樂隊，亦推出個人專輯。同佢合作過嘅音樂人更不計其數，隨便數一數便包括Eurythmics主將Dave Stewart、Blur主音 Damon Albarn、Tricky、The Lightning Seeds……或者你會比我更熟悉。近年The Specials重組，接連推出《Encore》（2019年）同《Protest Songs 1924-2012》（2021年），當中唔少作品關注種族、平權問題，其中一首更索性叫《B.L.M.》；但千祈咪以為佢哋太左膠，從一開始，The Specials已經係一隊包含不同種族膚色樂隊，由佢哋唱出呢類議題，極具說服力。

對我而言，最難忘Terry嘅作品，係The Colourfield《Thinking Of You》，一首Classic嘅英倫清新結他流行曲，長青雋永，聽一世都唔厭，亦為我開啟清新音樂世界大門。「If you ever think of me / I'll be thinking of you」相信每一位鍾意過Terry音樂嘅樂迷，都會永遠記住佢，日後間唔中會諗起佢，然後播返佢啲歌嚟聽。

The Colourfield《Thinking Of You》：

以上影片乃youtube提供,與本站無關; 若無法觀看,可查看原網址。