陳瀅回應龔嘉欣有骨對答指視后競爭大已積極準備盼於台慶頒獎禮冧莊

GIRLAV · 發表於 2022-11-10 17:08:40

TVB小生花旦位置一直競爭激烈，龔嘉欣早前接受媒體訪問時，被問到點睇陳瀅於《美麗戰場》表現就避而不答。不過句句有骨咁表示其實自己與陳瀅同年，只係自己19歲就簽TVB資歷深，係捱返嚟，好感恩由小蕃薯捱到宜家。對於龔嘉欣呢番說話，陳瀅就發表回應，仲話自己為出席台慶延遲返加拿大溫哥華探屋企人，又希望自己可以於頒獎禮奪獎。

陳瀅日前與周嘉洛、JW王灝兒、朱敏瀚及麥美恩以《痞子殿下》古裝造型為11月19日《萬千星輝賀台慶》開幕表演綵排，被問到龔嘉欣疑眼紅一事，陳瀅就表示二人從未合作過，雖然有聽聞呢件事，但無親眼睇過原裝訪問版本好難作準，因為有好多唔同嘅報道版本，相信係有加鹽加醋成分。對於龔嘉欣主演嘅《新四十二章》趕得切於頒獎禮播映，有機會爭奪視后寶座，陳瀅就直言仲有好多台慶劇未播及好多好演員有機會獲提名。

比起角逐視后，陳瀅更希望冧莊「最佳衣着獎」，表示已與造型師溝通要著啲同以前唔同嘅造型，指戰衣必須要靚，而唔係性感就係等於靚，透露多數會著黑色裙。不過，陳瀅又指因早前生日常與《痞子殿下》和《美麗戰場》台前幕後食生日飯，要開始積極瘦身做準備。