前巴塞教練對決　史坦恩「黃潛」首演失威

小哥阿四 · 發表於 2022-11-1 10:47:27

周一凌晨西甲賽事，畢爾包主場1比0擊敗維拉利爾，呢場係2位前巴塞隆拿教練對決，結果啱啱接替艾美利執教「黃色潛艇」嘅史坦恩首演失威，輸波之餘仲有主將盧施素受傷，認真慘情。

史坦恩早前接任維拉利爾主帥，首場聯賽對手畢爾包，史坦恩同對方教練華爾維迪早有淵源，2020年史坦恩就係接替華爾維迪成為巴塞隆拿教練，不過今次交鋒就由畢爾包勝出，主隊憑伊拿基威廉斯一箭定江山贏1比0。

維拉利爾輸波之餘，仲有阿根廷中場盧施素受傷退下火線，周五(4日)凌晨歐協聯作客列治普斯納上陣成疑。