賀拿戰勝癌魔　準備復操

小哥阿四 · 發表於 2022-10-29 10:13:30

今夏由阿積士加盟多蒙特嘅施巴斯坦賀拿，不幸喺開季前被驗出患上睪丸癌，呢位28歲前鋒經過手術及化療之後，已經成功戰勝癌魔，身體狀況亦恢復得七七八八，並準備重新投入操練。

施巴斯坦賀拿效力阿積士期間，上陣66場入47球，包括上屆歐聯有11球進帳，所以多蒙特今夏斥資3,100萬歐元收購呢位科特迪瓦國腳，代替離隊嘅艾寧夏蘭特，點知佢喺季前集訓時，被驗出患上睪丸癌，球員生涯幾乎毀於一旦。

幸好施巴斯坦賀拿及時獲得醫治，現時已經冇大礙，由於賀拿現時喺荷蘭養病，佢曾經詢問阿積士教練舒魯達，希望到呢支荷甲勁旅嘅基地參加訓練，對方亦好歡迎，施巴斯坦賀拿距離重返球場又行近一步。