艾歷迪亞都唔識　向後傳原來可以越位！

小哥阿四 · 發表於 2022-10-28 10:47:52

熱刺喺歐聯主場1比1逼和士砵亭，哈利卡尼補時5分鐘曾經上演絕殺，但VAR查足4分鐘後決定判入球無效，一眾熱刺職球員都包圍球證抗議。其中一個最大疑點係，當時哈利卡尼係接應艾馬遜頭槌回傳，兼且個波係彈中士砵亭球員先落喺哈利卡尼面前，令呢個判決充滿爭議。

比賽完結後，熱刺守將艾歷迪亞被影到走去質問球證：「點解咁判？點解？個波係向後回傳架！」不過根據球例，傳球方向對越位判決並冇影響，關鍵在於艾馬遜傳波嗰一刻，哈利卡尼身處個位置係喺波前面定後面。雖然當時艾馬遜明顯企前過哈利卡尼，但個波就同哈利卡尼幾乎同一水平，VAR拉線嘅畫面，亦係以個波同哈利卡尼嘅位置嚟畫，結果顯示哈利卡尼膝頭凸出，因此被判越位。

至於艾馬遜頭槌回傳期間，個波省中士砵亭球員改變方向，由於士砵亭球員並唔係「蓄意傳球」，所以同樣唔會影響越位判決。