馬天尼斯穩膽　馬古尼要同連迪路夫爭正選

小哥阿四 · 發表於 2022-10-26 20:55:03

早前受傷缺陣多場嘅曼聯隊長哈利馬古尼已經復操，近日華拉尼受傷缺陣3周情況下，馬古尼有機會「強勢回歸」，不過《曼徹斯特晚報》指出，新加盟嘅利辛度馬天尼斯地位穩如泰山，馬古尼將要同域陀連迪路夫爭正選席位。

經過季初一輪試陣，坦哈格終於搵到最穩陣後防拍擋，就係華拉尼搭利辛度馬天尼斯，馬古尼同連迪路夫只能靠邊站，但依家華拉尼受傷，消息指要休息3星期，馬古尼同連迪路夫呢段時間都有上陣機會。

馬古尼早前受傷，連迪路夫成為曼聯第3中堅選擇，依家馬古尼復操，兩人將會直接競爭，喺未來3周英超及歐霸盃賽事將會輪流上陣，不過當華拉尼傷愈復出，佢兩個又會重新回到後備席，等待下次出場機會，所以呢段時間，佢哋都要好好珍惜，表現自己。