拜仁德盃過關　祖普莫亭效率勁過羅拔仔！

小哥阿四 · 發表於 2022-10-21 10:19:58

德國盃第2圈賽事，拜仁慕尼黑周四(20日)凌晨作客5比2大破奧格斯堡，前鋒祖普莫亭繼續有出色表現，今場又有2個入波同1次助攻，原來呢位喀麥隆前鋒喺拜仁慕尼黑嘅入波效率，竟然仲勁過羅拔利雲度夫斯基！

拜仁上場聯賽對弗賴堡，祖普莫亭今季首次正選有1入波1助攻，今場德盃佢繼續掛帥，拜仁9分鐘先失波，但祖普莫亭27分鐘就追平，呢位中鋒53分鐘助攻甘美治射成2比1，6分鐘後再攻入個人第2球。奧格斯堡65分鐘追番1球，但穆斯亞拿同艾方素戴維斯尾段入波，助拜仁大勝5比2晉級。

自從2年前加盟拜仁後，祖普莫亭喺2,129分鐘上陣時間入面，交出22個入波同8次助攻，平均71分鐘就有1個入球貢獻，而羅拔利雲度夫斯基喺同一段時間內，平均每76.3分鐘先有1個入球貢獻，可見祖普莫亭嘅實力絕對唔差！