哥帥否認夏蘭特合約有「皇馬條款」

小哥阿四 · 發表於 2022-10-7 10:40:29

曼城前鋒艾寧夏蘭特今季瘋狂入球，被視為當今最強前鋒，雖然佢加盟曼城只係幾個月，但西班牙媒體就爆料，指艾寧夏蘭特終極目標係效力皇家馬德里，而佢合約內更有「皇馬條款」，容許皇馬出價收購，不過曼城領隊哥迪奧拿已立即出面否認。

西班牙《機密報》報道，夏蘭特今夏同曼城簽約5年，但當中包含2024年開始啟動嘅「皇馬條款」，條款指皇馬喺2024年可以用2億歐元將佢買斷，到2025年降至1.75億歐元，類似嘅條款喺夏蘭特之前同薩爾斯堡、多蒙特嘅合約都有存在。

曼城喺歐聯大勝哥本哈根後，哥迪奧拿就罕有公開回應：「夏蘭特合約內冇皇馬條款，亦冇同其他球隊有關嘅條款，呢啲唔係真實嘅事我有咩好講？我覺得夏蘭特依家好開心，我哋亦會令佢覺得開心，不實傳聞我哋控制唔到。」