基斯坦臣韌帶受傷　巴塞得番2個中堅

小哥阿四 · 發表於 2022-10-6 10:06:34

巴塞隆拿喺歐聯不敵國際米蘭，輸波之餘仲損兵折將，中堅安達斯基斯坦臣喺下半場開波冇耐受傷，要由老將碧基入替，球會隨後發聲明證實呢位丹麥中堅足踝韌帶受傷，令巴塞隆拿只係得番2個中堅候命。

巴塞指安達斯基斯坦臣嘅足踝韌帶傷患仍要詳細檢查，但《阿斯報》率先爆料，話基斯坦臣至少要抖3個星期，由於2位正選中堅朗奴阿拿奧祖同祖利斯古迪都喺國際賽受傷，球隊依家只係得番艾利加西亞同碧基2名中堅可以候命。

如果安達斯基斯坦臣真係抖3個星期，將會缺席5場大戰，包括歐聯主場對國際米蘭，以及西甲作客皇家馬德里2大關鍵大戰。唔好忘記，巴塞右閘比利連日前亦告受傷，右閘位亦只係得沙治羅拔圖頂住。