美斯轟入60個罰球　拋離C朗

小哥阿四 · 發表於 2022-10-3 10:37:21

周日(2日)凌晨法甲，巴黎聖日耳門(PSG)主場以2比1擊敗尼斯，球王美斯射入1個靚罰球，職業生涯累積入60個罰球，成為射入最多罰球嘅現役球員，並進一步拋離宿敵C朗。

今場開賽29分鐘，美斯喺禁區頂主射罰球入網，亦係呢位35歲老將效力PSG以來，首次以罰球破網。值得一提，美斯喺日前國際熱身賽為阿根廷上陣對牙買加，射入罰球，打破450日罰球入球荒之後，果然陸續有來。

美斯職業生涯60次射入罰球，有50次效力巴塞隆拿時期射入，踢國家隊有9次射入罰球，加盟PSG後今場亦「開齋」。同埋美斯早前對牙買加，射入罰球後，已經超越C朗，成為現役「罰球王」，今場進一步改寫紀錄。

PSG今場領先後，曾經被尼斯一度扳平，幸好有基利安麥巴比後備上陣做英雄，喺83分鐘射入致勝1球。基利安麥巴比效力PSG以來，有48場聯賽主場取得入球，PSG全部都贏波。