達洛治進攻大爆發　曼聯開新約綁人

小哥阿四 · 發表於 2022-9-27 10:11:29

葡萄牙上場歐國聯大勝捷克，右閘達洛治「意外」開齋之餘，仲一口氣攻入2球。呢位曼聯球星今季成功企穩正選，而且更被領隊坦哈格解放進攻潛能，今季助攻頻頻有斬鑊，曼聯已經急不及待向佢開出新約將佢「綁」住。

達洛治上季喺蘭歷克執教後，成功壓倒雲比沙卡成為正選，但24場聯賽0入波0助攻，表現麻麻。曼聯今夏收購右閘計劃失敗，反而令達洛治有機會上位，佢喺坦哈格戰術下更多機會助攻，今季8場比賽已有2次助攻，踢國家隊更加梅開二度，助攻威力全面爆發。

23歲嘅達洛治同曼聯合約明年夏天完結，據報巴塞隆拿對佢虎視眈眈，不過《曼徹斯特晚報》指曼聯有權啟動佢合約內自動續約1年條款，而且坦哈格更希望同達洛治續一份長約，意味曼聯已視佢為長遠計劃一部份。