華維迪大爆發 誓保安察洛堤教練執照！

小哥阿四

皇家馬德里今季氣勢如虹，就算王牌前鋒賓施馬受傷缺陣，「銀河艦隊」仍然戰無不勝，周一(19日)作客擊敗馬德里體育會一仗，烏拉圭中場費達歷高華維迪繼續爆發，呢位24歲球星連續第3場入波，有望「保住」安察洛堤嘅教練執照！

費達歷高華維迪上周中歐聯入波後，皇馬教練安察洛堤表示：「上季好奇怪，佢(華維迪)只係入咗1球波，如果唔可以令佢一季入10球或以上，我應該撕爛自己嘅教練牌照，直接退休。」費達歷高華維迪近期改踢翼鋒，連續3場入波後今季已有4球進帳，以佢嘅走勢大有機會有雙位數入球。

安察洛堤喺對馬體會後再讚揚：「洛迪高同華維迪非常特別，佢哋係現代足球員嘅典範，現代足球員需要全能，體力、技術兼備，仲要可以踢多個位置，好開心皇馬擁有洛迪高同華維迪呢啲球員。」

LasCases

火力強勁。