迪基亞又落選西班牙　踢世界盃凍過水

小哥阿四 · 發表於 2022-9-18 11:00:33

西班牙國家隊主帥安歷基公布新一期大軍名單，曼聯門將迪基亞再次落選，佢已經10個月未曾晉身國家隊，距離今屆世界盃決賽周舉行日子愈來愈近，似乎安歷基已無意徵召呢位31歲鋼門出戰世界盃。

西班牙今次名單上3位門將，包括畢爾包嘅烏尼西蒙、白禮頓門將羅拔山齊士、賓福特門將大衞拉耶。同樣喺英超搵食，安歷基寧願揀效力細球會嘅羅拔山齊士、大衞拉耶，都唔要迪基亞，就知佢已經放棄呢位名將。

迪基亞踢對上一次入選西班牙，已經係上年11月對瑞典，由此推斷，佢參加今屆世界盃機會非常渺茫。

至於其餘常規主力都有入選，巴塞隆拿佔咗6人，比較令人意外係安歷基召入兩位從未為國家隊上陣嘅球員，包括29歲嘅貝迪斯前鋒保查艾利斯亞斯、20歲嘅畢爾包前鋒尼高威廉斯。

西班牙將於9月25日凌晨歐國聯對瑞士、9月28日凌晨對葡萄牙。