自我感覺良好　C朗係時候開齋？

小哥阿四 · 發表於 2022-9-16 10:35:40

曼聯將於周五(16日)凌晨歐霸盃作客舒列夫，紅魔鬼球星C朗喺社交網發文，話感覺良好，睇嚟心情唔錯，可能今場就係佢打破入球荒嘅時候。

37歲嘅C朗今季各項賽上陣7場，仍然未取得入球，上輪歐霸盃分組賽對皇家蘇斯達，佢踢足全場，但都係冇波入，表現難免令人失望。

不過，呢位葡萄牙國腳已經重拾心情，上載操練相到社交網，表示感覺良好。值得一提，相中仲有今季新加盟嘅中場卡斯米路，呢位巴西國腳同C朗一樣喺英超擔任後備，今場歐霸盃應該可以一齊踢正選。