狼隊神鋒首演即收咧　急簽迪亞高哥斯達

小哥阿四 · 發表於 2022-9-6 10:47:10

狼隊喺轉會窗完結前，用1,500萬鎊簽入奧地利前鋒沙沙卡拉積錫，不過呢位射手日前對修咸頓首演，只係踢咗半場就受傷被換，經軍醫檢查後發現膝部韌帶重傷，傳聞好大機會提早收咧。狼隊亦即刻做嘢，傾掂自由身嘅迪亞高哥斯達，佢周二(6日)會飛英國做體測並正式簽約。

狼隊前鋒魯爾占美尼斯一直受傷患困擾，所以球隊重金簽入沙沙卡拉積錫，估唔到第1場波就重傷。狼隊官方聲明表示：「沙沙卡拉積錫半場覺得膝頭不適，好不幸，檢查證實佢膝頭前十字韌帶受傷，嚟緊會再接受專家診治，我哋會喺佢康復路上作出支持。」

消息指沙沙卡拉積錫將會提早收咧，而狼隊已經聯絡今年初同明尼路解約嘅迪亞高哥斯達，呢位33歲前鋒曾效力過車路士3年，今次重返英超並唔陌生。